धारावी पुनर्वसन प्रकल्प कंपनी
म्हाडा कार्यालयातून गाशा गुंडाळणार
- किंग्ज सर्कल येथे स्थलांतर
सकाळ वृत्तसेवा
मुंबई, ता. ३० : धारावी झोपडपट्टीचा कायापालट करण्यासाठी राज्य सरकारने स्थापन केलेल्या धारावी पुनर्विकास प्रकल्प (डीआरपी) या कंपनीचे कार्यालय कंपनीच्या स्थापनेपासून म्हाडाचे मुख्यालय असलेल्या इमारतीच्या पाचव्या मजल्यावर आहे, पण डीआरपीने आता आपला येथील गाशा गुंडाळण्याची तयारी केली असून किंग्ज सर्कल येथील नव्या इमारतीत लवकरच हलवले जाणार आहे. त्यासाठी फायलींची आवराआवर सुरू आहे.
धारावी पुनर्विकास प्रकल्प कंपनीचे कार्यालय सध्या म्हाडाच्या वांद्रे पूर्व येथील मुख्यालयात आहे. सदर कार्यालय घटस्थापनेच्या मुहूर्तावर किंग्ज सर्कल येथे हलवले जाणार असल्याची माहिती समोर आली आहे. वर्षानुवर्षे अडगळीत असलेले हे कार्यालय धारावी पुनर्विकास प्रकल्पाचे प्रत्यक्ष काम सुरू झाल्यापासून प्रकाशझोतात आले आहे.
सध्याच्या धारावीत सुरू असलेले सर्वेक्षण, नंबरिंग आदी कामे सुरू झाली असून त्यांच्या अधिकारी-कर्मचाऱ्यांसाठी कार्यालय अपुरे पडत आहे. त्यामुळे हे कार्यालय किंग्ज सर्कल षण्मुखानंद हॉल येथील एका तीन मजली भव्य इमारतीत हलविण्यात येणार आहे. या नवीन वास्तूचे पितृपक्षपूर्वी गणेशपूजनही उरकून घेण्यात आल्याचे बोलले जात आहे. पितृपक्ष संपल्यावर घटस्थापनेच्या पहिल्या दिवशी नवीन कार्यालयात कामकाज सुरू केले जाणार असल्याची माहिती सूत्रांनी दिली.