भाजपचे पदाधिकारी जाहीर
मुलुंड, ता. ३ (बातमीदार) ः राज्यातील विधानसभा निवडणुकीचे बिगुल कधीही वाजण्याची शक्यता आहे. याच अनुषंगाने भाजपने मुलुंड विधानसभा निवडणुकीसाठी अध्यक्ष तथा संयोजक म्हणून भाजपचे ज्येष्ठ नेते नरेश चंदाराणा यांची निवड केली आहे. चंदराणा यांनी भाजपच्या विस्तारासाठी आपले अमूल्य योगदान दिले आहे. तसेच, ईशान्य मुंबई भाजपचे अध्यक्ष म्हणूनदेखील त्यांनी यशस्वी कामगिरी केली आहे. याशिवाय मुलुंड विधानसभा महायुतीचे समन्वयक म्हणून जितेंद्र परब यांची नियुक्ती करण्यात आली आहे. ते मुलुंडचे माजी आमदार वामनराव परब यांचे पुत्र आहेत. ईशान्य मुंबई जिल्हाध्यक्षपदी दीपक दळवी यांची नियुक्ती केली आहे. विद्यमान जिल्हाध्यक्ष अशोक राय यांचा कार्यकाळ पूर्ण झाल्याने त्यांच्या जागी दीपक दळवी यांची नियुक्ती करण्यात आली आहे.