श्रीवर्धन-अलिबाग गाडीला अखेरीस ग्रीन सिग्नल
उत्पन्न कमी असल्याचे सबब देत २०१८ ला केली होती बंद
श्रीवर्धन, ता. ३१ (बातमीदार)ः एसटी महामंडळाकडून बंद केलेली श्रीवर्धन- अलिबाग गाडीला अखेरीस ग्रीन सिग्नल देण्यात आला आहे. त्‍यामुळे अलिबाग मार्गावरील प्रवाशांना दिलासा मिळाला आहे.
श्रीवर्धन आगाराची स्थापना १९८७ रोजी झाली. स्थापनेनंतर आगाराकडून मुंबई शहरापासून तळकोकणापर्यंत तर अनेक स्थानिक फेऱ्या सुरू करण्यात आल्या. प्रशासकीय कार्यालयांचे मुख्यालय असणाऱ्या अलिबाग येथे ही अनेक वर्षे नियमित वेळापत्रकानुसार मार्गस्थ होणारी व आर्थिक उत्पन्नात अग्रेसर असणारी अलिबाग गाडी २०१८ रोजी अचानक बंद करण्यात आली. महत्त्वाची कार्यालये अलिबाग येथे असल्याने श्रीवर्धन व म्हसळा तालुक्यातील शासकीय कर्मचारी व शासकीय कार्यालयात वैयक्तिक कामे असणाऱ्या नागरिकांना अलिबाग एसटी उपयुक्त होती. १९८७ ते २०१८ रोजीपर्यंत क्षमतेपेक्षा जास्त प्रवासी वाहतूक करणारी गाडी अशी ख्याती असणारी अलिबाग एसटी आर्थिक उत्पन्न कमी असल्याचे सबब देत बंद करण्यात आली. प्रवासीवर्गाने मागणी केल्यावर समाधानासाठी काही दिवसांसाठी सदरची गाडी सुरू करण्यात आली होती, मात्र ती कायमची बंद करण्यात आली. त्‍यानंतर शिवसेना (शिंदे गट) श्रीवर्धन शहर संघटना पदाधिकाऱ्यांनी महाराष्ट्र राज्य मार्ग परिवहन महामंडळाचे अध्यक्ष भरत गोगावले यांची भेट घेत प्रवाशांच्या सेवेसाठी श्रीवर्धन-अलिबाग एसटी बस सुरू करावी, अशी विनंती करण्यात आली होती. प्रवासीवर्गाची दखल घेत श्रीवर्धन-अलिबाग गाडीला अखेरीस ग्रीन सिग्नल मिळाला आहे. श्रीवर्धन येथून मार्गस्थ होण्याची वेळ सकाळी साडेपाच तर अलिबाग येथून परतीची वेळ सायंकाळी साडेचार आहे. गाडीचा जाण्या-येण्याचा मार्ग म्हसळा, माणगाव, वडखळ असा आहे.
======≠≠===========================================================================================
अलिबागची होती वाट बिकट
श्रीवर्धन तालुक्यातील प्रवासीवर्गाला अलिबाग येथे जाण्यासाठी पहाटेची मुंबई किंवा कल्याण गाडीने वडखळ गाठने व पुढे अलिबागला परतीच्या वेळेस वडखळ, माणगाव, म्हसळा टप्पे करीत श्रीवर्धन असा त्रासदायक प्रवास करावा लागत होता.