मालमत्ता कराच्या थकबाकीदारांना पालिकेकडून जप्तीची नोटीस
१० मोठ्या मालमत्ताधारकांकडे सुमारे २२२ कोटी रुपयांची थकबाकी
सकाळ वृत्तसेवा
मुंबई, ता. २४ ः मालमत्ता कर भरण्यास टाळाटाळ करणाऱ्या तसेच आर्थिक क्षमता असूनही मालमत्ता कर न भरणाऱ्या मोठ्या थकबाकीदारांना मुंबई महापालिकेकडून जप्तीची नोटीस बजावण्यात आली आहे. दिलेल्या मुदतीत करभरणा न केल्यास जप्त केलेल्या मालमत्तेचा लिलाव केला जाईल, असे नोटिसीद्वारे पालिकेने स्पष्ट केले आहे.
मालमत्ता कर हा महापालिकेच्या उत्पन्नाचा मुख्य स्रोत आहे. देयके मिळाल्यापासून मालमत्ताकर ९० दिवसांच्या आत महापालिकेकडे जमा करणे आवश्यक आहे. या कालावधीत कर न भरल्यास महानगरपालिकेकडून टप्पेनिहाय कारवाई सुरू करण्यात येते. मालमत्ताधारकास २१ दिवसांची अंतिम नोटीस दिली जाते. त्यानंतर थकबाकीदारांची मालमत्ता जप्ती, लिलाव आदी कारवाई केली जाते.
महापालिका आयुक्त भूषण गगराणी, अतिरिक्त महानगरपालिका आयुक्त (शहर) डॉ. अश्विनी जोशी यांच्या नेतृत्वाखाली आणि सहआयुक्त (कर निर्धारण व संकलन) विश्वास शंकरवार यांच्या मार्गदर्शनाखाली कर निर्धारण व संकलन खात्याच्या वतीने मुंबई शहर आणि उपनगरांमधील मालमत्ता कर वसुलीचे उद्दिष्ट साध्य करण्यासाठी विविध प्रयत्न केले जात आहेत. कर भरणा करण्याची गैरसोय टाळण्यासाठी ऑनलाइन सुविधा उपलब्ध आहे. याबाबतची माहिती महापालिकेच्या https://www.mcgm.gov.in या संकेतस्थळावर उपलब्ध आहे. करभरणा ऑनलाइन करण्यासाठी करदात्यांनी महापालिका संकेतस्थतळावरील माहितीचा वापर करावा, असे आवाहन करण्यात येत आहे.
काही मोठ्या थकबाकीधारकांकडून अद्याप कर भरणा करण्यात येत नसल्याने आाणि त्यांना वेळोवेळी सूचना देऊनही योग्य प्रतिसाद मिळत नसल्याने कर निर्धारण व संकलन खात्याच्या वतीने जप्तीची नोटीस बजावण्यात आल्या आहेत. दंड रकमेसह थकबाकी रकमेचा यात समावेश आहे. महानगरपालिका अधिनियमातील तरतुदीनुसार लिलावाची कार्यवाही करण्यात येईल. यामुळे नोटीसप्राप्त मालमत्ताधारकांनी कारवाई टाळण्यासाठी तातडीने कर भरणा करावा, असे आवाहन पालिका प्रशासनाकडून करण्यात आली आहे.