नवी मुंबई, ता. ३ (वार्ताहर) : सीबीडी भागात राहणाऱ्या एका २१ वर्षीय तरुणाने खारघरमधील १७ वर्षीय अल्पवयीन मुलीवर इमारतीच्या टेरेसवर जबरदस्तीने लैंगिक अत्याचार केल्याचा प्रकार उघडकीस आला आहे. याप्रकरणी खारघर पोलिस ठाण्यात गुन्हा दाखल आहे.
पीडित मुलगी खारघरमध्ये राहण्यास असून तिच्यावर अत्याचार करणारा आरोपी डवेन शेख हा सीबीडी सेक्टर-९ येथे राहतो. काही दिवसांपूर्वीच डवेनची ओळख पीडित मुलीसोबत झाली होती. त्यानंतर त्याने त्रास देण्यास सुरुवात केली होती. सोमवारी रात्री आठच्या सुमारास पीडित मुलीवर जबरदस्तीने लैंगिक अत्याचार करण्यात आला होता. हा प्रकार पीडित मुलीने आई-वडिलांना सांगितल्यानंतर खारघर पोलिस ठाण्यात याप्रकरणी तक्रार करण्यात आली. त्यानुसार बलात्कारासह पोक्सो कलमानुसार गुन्हा दाखल करून मंगळवारी पहाटे पोलिसांनी डवेनला अटक केली.