दैवज्ञ परिषदेचे १९ डिसेंबरपासून अधिवेशन
सकाळ वृत्तसेवा
मुंबई, ता. ५ : अखिल भारतीय दैवज्ञ समाजोन्नती परिषदेचे राष्ट्रीय अधिवेशन १९ ते २२ डिसेंबरदरम्यान पुणे येथे होणार आहे. दैवज्ञ समाजोन्नती परिषदेचे अध्यक्ष आणि संमेलनाध्यक्ष डॉ. गजानन रत्नपारखी यांच्या मार्गदर्शनाखाली चार दिवस हा सोहळा होणार असून, श्री अष्टभुजा दुर्गादेवी इस्टेट ट्रस्ट संस्थेने त्याची जय्यत तयारी केली आहे. देशभरातील असंख्य दैवज्ञ बांधव या अधिवेशनास उपस्थित राहणार आहेत. त्याचवेळी दहावे दैवज्ञ साहित्य संमेलनही पुण्यनगरीत रंगणार आहे.

दैवज्ञ समाजोन्नती परिषदेचे २१वे राष्ट्रीय अधिवेशन व दहाव्या दैवज्ञ साहित्य संमेलनाचा भव्य सोहळा १९ ते २२ डिसेंबरपर्यंत पुण्यातील शुक्रवार पेठ येथील गणेश कला क्रीडा मैदानावर होणार आहे. गुरुवार, १९ डिसेंबरला सायंकाळी चार वाजता भव्य शोभायात्रा निघणार आहे. शुक्रवारी २० डिसेंबरला सकाळी ८.३० वाजता उद्‌घाटनाचा सोहळा होणार आहे. पद्माकरराव पांडुरंगपंत रत्नपारखी व स्व. सुमती रत्नपारखी नगरीत सकाळी १० वाजता केंद्रीय सहकार व नागरी वाहतूक राज्यमंत्री मुरलीधर मोहोळ यांच्या प्रमुख उपस्थितीत डॉ. गजानन रत्नपारखी व अजय कारेकर यांच्या हस्ते अधिवेशनाचे उद्‌घाटन होणार आहे. या वेळी दैवज्ञ समाजोन्नती परिषदेचे उपाध्यक्ष डॉ. आनंद पेडणेकर, नाना शंकरशेट प्रतिष्ठानचे अध्यक्ष, समाजश्रेष्ठी सुरेंद्र शंकरशेट यांच्यासह डॉ. गजानन रत्नपारखी अध्यक्षीय भाषणात मार्गदर्शन करणार आहेत, अशी माहिती स्वागताध्यक्ष विजय कारेकर व परिषदेचे सरचिटणीस चंद्रशेखर दाभोळकर यांनी दिली.

दैवज्ञ साहित्य संमेलनाचे उद्‌घाटन दुपारी तीन वाजता साहित्य संमेलनाध्यक्ष कृष्णी वाळके यांच्या हस्ते होणार आहे. या वेळी ज्येष्ठ अभिनेते राहुल सोलापूरकर प्रमुख पाहुणे म्हणून उपस्थित राहणार आहेत. साहित्य, नाट्य, ग्रंथ हंडी व कार्यकर्ता गौरव(बोल्ड) २२ डिसेंबरला संत साहित्य, प्रेरणादायी आत्मचरित्र, पत्रकारिता आणि साहित्य, नाट्य व साहित्य, ग्रंथ हंडी आदींवर मान्यवर लेखक, साहित्यिक मार्गदर्शन करणार आहेत. याच वेळी दैवज्ञ साहित्य मंच पदाधिकारी, यजमान संस्थेचे पदाधिकारी व कार्यकर्त्यांचा गौरव करण्यात येणार आहे. दुपारी तीन वाजता या चारदिवसीय अधिवेशनाचा समारोप होणार आहे.