रहिवाशांच्या शंका निरसनासाठी काॅल सेंटर
सकाळ वृत्तसेवा
मुंबई, ता. १० : धारावी पुनर्विकास प्रकल्पांतर्गत धारावीचा कायापालट केला जाणर आहे. त्यासाठी सुरू असलेल्या सर्वेक्षणादरम्यान रहिवाशांकडून वेगवगेळ्या शंका उपस्थित केल्या जातात. त्यांच्या शंकांचे निरसन करून संबंधित रहिवाशांना सर्व्हे प्रक्रियेत सहभागी करून घेण्यासाठी धारावी पुनर्विकास प्रकल्पाने (डीआरपी) जागरूकता मोहीम सुरू केली आहे. त्यानुसार काॅल सेंटर सुरू केले आहे, तसेच लहान सभा घेण्यास सुरुवात केली आहे.
डीआरपीच्या कॉल सेंटरमधून धारावीतील रहिवाशांना सध्या धारावीत सुरू असलेल्या सर्वेक्षणाबाबत माहिती देऊन त्यांच्या विविध शंकांचे निरसन करण्यात येत आहे. या कॉल सेंटरमधील टेलीकॉलर्स मराठी, हिंदी, तमिळ, गुजराती आणि इंग्रजी भाषेतून रहिवाशांशी संवाद साधत आहेत. "पात्रता, सर्वेक्षणासाठी आवश्यक दस्तऐवज आणि पुनर्विकासात रहिवाशांचा हक्क या विषयीच्या शंकांचे निरसन करण्यासाठी धारावीकरांनी १८००२६८८८८८ या टोल फ्री क्रमांकाचा वापर करावा, असे आवाहन करण्यात आले आहे. आतापर्यंत येथील ७० हजारांहून अधिक घरांचे सर्वेक्षण पूर्ण झाले आहे. सर्व्हेदरम्यान रहिवाशांची स्कॅन करून घेतली जाणारी कागदपत्रे सुरक्षित असल्याचेही डीआरपीने स्पष्ट केले आहे.