मनोर, ता. १८ (बातमीदार) : अनधिकृत गौण खनिज वाहतुकीवर कारवाईसाठी कार्यरत असलेले महसूल विभागाचे भरारी पथक लाचलुचपत विभागाच्या जाळ्यात अडकले आहे. मंगळवारी (ता. १८) पहाटे तीन वाजण्याच्या सुमारास शिरसाड-वज्रेश्वरी रस्त्यावर मांडवी भागात भरारी पथकातील दोन पोलिस कर्मचारी आणि एका खासगी व्यक्तीला ५० हजारांची रक्कम घेताना लाचलुचपत विभागाकडून ताब्यात घेण्यात आले आहे. याप्रकरणी मांडवी पोलिस ठाण्यात गुन्हा दाखल आहे.

पालघर जिल्ह्यात अनधिकृत गौण खनिज उत्खनन आणि वाहतुकीवर कारवाई करण्यासाठी महसूल विभागअंतर्गत खनिकर्म विभागाच्या अखत्यारीत जिल्हा स्तरावर भरारी पथकांची निर्मिती करण्यात आली आहे. गेल्या काही वर्षांपासून शुल्क निरीक्षक मारोती सूर्यवंशी यांच्या नेतृत्वाखाली भरारी पथक कार्यरत आहे. या पथकाने सोमवारी (ता. १७) सायंकाळी वज्रेश्वरी-शिरसाड रस्त्यावर खडी नेणारा ट्रक थांबवून वाहतूक परवाना नसल्याने दंडात्मक कारवाईचा अहवाल तयार करून ट्रक मांडवी पोलिसांच्या ताब्यात देण्यात आला होता. त्यानंतर पथकातील दोन पोलिस कर्मचारी आणि खासगी व्यक्तीने रस्त्यावरून खडी वाहतूक करणाऱ्या दोन ट्रक थांबवून वाहतूक परवाना नसल्याने दंडात्मक कारवाई केली जाईल, असे तिघांकडून ट्रकमालकाला सांगण्यात आले. ही कारवाई टाळण्यासाठी दोन लाखांच्या लाचेचा प्रस्ताव ट्रकमालकाला देण्यात आला. त्याने दोन लाख रुपये देण्याची तयारी असल्याचे सांगत पालघरच्या लाचलुचपत विभागाला माहिती दिली.

पहाटेच्या वेळी कारवाई
लाचलुचपत प्रतिबंधक विभागाकडून सापळा रचून मंगळवारी पहाटे तीन वाजण्याच्या सुमारास ५० हजारांची रोख रक्कम घेताना भरारी पथकातील पोलिस कर्मचारी दत्ता शिंदे, श्रीराम डाखुरे आणि खासगी व्यक्ती तृणाल धनु याला ताब्यात घेतले. या वेळी भरारी पथक प्रमुख मारोती सूर्यवंशी उपस्थित नव्हते. ही कारवाई पालघर जिल्हा लाचलुचपत विभागाचे उपविभागीय अधिकारी हर्षल चव्हाण यांच्या पथकाने केली.