शिवाजी पार्कवर मनसेचे आज भव्य पुस्तक प्रदर्शन
मराठी भाषादिनी दिग्गजांचे काव्यवाचन
प्रभादेवी, ता. २६ (बातमीदार) : ज्ञानकोषाचे भांडार असलेल्या मराठी भाषेतील अफाट साहित्याच्या भव्य पुस्तकांचे प्रदर्शन दादरच्‍या शिवाजी पार्क येथे मनसेच्या वतीने भरविण्यात येणार असून, दिग्गजांचे कविता वाचनदेखील होणार आहे. मनसेच्या वतीने मराठी भाषा गौरव दिनानिमित्त गुरुवारी (ता. २७) सायंकाळी सहा वाजता शिवाजी पार्क येथे पुस्तक प्रदर्शनाचे उद्‌घाटन करण्यात येणार असून, वाचकांना ही पुस्तके पर्वणीच ठरणार आहेत. या वेळी ज्येष्ठ गायिका आशा भोसले, सिनेअभिनेता विकी कौशल, रितेश देशमुख, सोनाली बेंद्रे, आशुतोष गोवारीकर, अभिजित जोशी, शर्वरी वाघ, नागराज मंजुळे, विजय दर्डा, भरत दाभोळकर, गिरीश कुबेर, पराग करंदीकर, राजीव खांडेकर, महेश मांजरेकर, लक्ष्मण उतेकर आदी दिग्गज मान्यवर तसेच स्वतः राज ठाकरे आपल्या आवडीची कविता वाचन करणार आहेत. नामांकित प्रकाशकांची १०५ स्टॉल्सवर पुस्तके या प्रदर्शनात मांडण्यात येणार असून, सायंकाळी सहा ते नऊ आणि २८ ते २ मार्च या कालावधीत सकाळी १० ते सायंकाळी नऊ या वेळेत ती वाचनप्रेमींना चाळायला मिळतील.
आदानप्रदान याअंतर्गत घरातील जुने पुस्तक आणि १० रुपये देऊन कोणतेही पुस्तक वाचकांना कुठलेच मूल्य न देता घेता येणार आहे
याशिवाय येवल्याचे कापसे आणि सोनीची पैठणी कशी विनली जाते हेदेखील पाहायला मिळणार आहे. तर प्रशांत कॉर्नरचे खाद्य पदार्थांचे स्टॉल्सदेखील या ठिकाणी लावण्यात येणार असल्याचे मनसेचे उपाध्यक्ष यशवंत किल्लेदार यांनी सांगितले.