पालघर, ता. १० (बातमीदार) : देशी वाणांची बियाणी टिकावीत, त्यांची देवाण-घेवाण व्हावी, बियाणांचे संवर्धन व्हावे आणि त्यांचा प्रचार-प्रसार व्हावा या हेतूने पालघर येथील सोनोपंत दांडेकर महाविद्यालयाने २९ मार्च रोजी बियाणे महोत्सवाचे आयोजन केले आहे. या महोत्सवाचे उद्‍घाटन संस्थेचे अध्यक्ष सचिन कोरे यांच्या हस्ते होणार आहे.

पालघर जिल्ह्यातील शेतकरी, बागायतदार आणि देशी बियाणे संवर्धक आपल्याजवळ असलेली वेगवेगळी देशी बियाणी प्रदर्शनात मांडतील. त्यांची खरेदी-विक्री होईल. त्यासाठी महाविद्यालयातर्फे मोफत स्टॉल उपलब्ध करून दिला जाईल. फुलझाडे, पालेभाज्या, फळभाज्या, फळबिया, रानभाज्या, तृणधान्ये, कंद, औषधी वनस्पती आणि इतर अन्नधान्याचे देशी वाण यांची बियाणी प्रदर्शनात मांडण्यासाठी शेतकरी घेऊन येतील. बियाणे महोत्सवात सहभागी होऊ इच्छीणाऱ्या शेतकऱ्यांनी २५ मार्चपर्यंत नोंदणी करावी. वनस्पतीशास्त्र विभाग प्रमुख डॉ. अस्मिता राऊत (९८६७३९७७५३), डॉ. प्रकाश घरत (८३२९३२५५८२), डॉ. स्वप्नील केणी (९०२८६७८३३८) यांच्याशी संपर्क साधावा, असे महाविद्यालयाकडून सांगण्यात आले. चिंचणीचे ऑर्चिड फुलांचे उत्पादक रामचंद्र सावे आणि वाणगावचे ढोबळी मिरची उत्पादक राजेंद्र चुरी यांची सुहास राऊत हे मुलाखत घेणार आहेत.