जव्हार, ता. १२ (बातमीदार) : निसर्गसौंदर्याने नटलेल्या जव्हार तालुक्यात झालेली बेसुमार वृक्षतोड, निसर्गाचा लहरीपणा या बाबींमुळे वातावरणात बदल जाणवत आहे. यंदा मार्चच्या पहिल्या पंधरवड्यातच उन्हाचा चटका जाणवत आहे. गेल्या दोन दिवसांपासून तालुक्यात उष्णतेची तीव्र लाट निर्माण झाली आहे. त्यामुळे अंगाची लाही लाही होत आहे. उन्हाचा वाढलेला तडाखा बघता सामान्य जनतेने काळजी घ्यावी, असे आवाहन जव्हार नगर परिषदेच्या मुख्याधिकारी तथा प्रशासक मानिनी कांबळे यांनी नागरिकांना केले आहे.

फेब्रुवारीच्या अखेरीस राज्यातील सरासरी तापमानात तीन ते चार अंशांची वाढ झाली. त्यामुळे जव्हारचा पारा थेट ३७ अंशांपर्यंत जाऊन पोहोचला. वाढलेल्या तापमानावरून यंदाचा उन्हाळा अधिक कडक असणार, याचा अंदाज आला. त्यातच मागील दोन दिवसांपासून उष्णतेची तीव्र लाट पसरली आहे. आठवड्याच्या पहिल्याच दिवशी (ता. १०) जव्हारचा पारा ३७ अंशावर स्थिरावला. उकाड्यात झालेली वाढ लक्षात घेता जव्हार नगर परिषद प्रशासन तथा जिल्हा आपत्ती व्यवस्थापन विभागाने काळजी घेण्याचे आवाहन केले आहे.