बॅगमध्ये आढळले महिलेचे शिर
विरार, ता. १४ (बातमीदार) : विरार पूर्वेकडील दर्गा परिसरात गुरुवारी सायंकाळी एका बॅगमध्ये महिलेचे शिर आढळल्याने खळबळ उडाली. घटनास्थळी मांडवी पोलिसांनी धाव घेऊन शिर ताब्यात घेऊन यासंदर्भात अज्ञाताविरोधात गुन्हा दाखल केला आहे.
तरुणांचा एक समूह गुरुवारी (ता. १३) सायंकाळी होळीनिमित्ताने विरार येथील पिरकुंडा दर्ग्यासमोर पार्टीसाठी गेला होता. तेथे या तरुणांना मोठी बॅग आढळून आली. या बॅगेत पासणी केली असता त्यामध्ये महिलेच्या शरीराची कवटी दिसून आली. त्यांनी तत्काळ यासंदर्भात मांडवी पोलिसांना याची माहिती दिली. पोलिसांनी घटनास्थळी धाव घेत पंचनामा सुरू केला. पोलिसांना घटनास्थळी अजून एक बॅग मिळाली. त्यामध्ये काही वस्तूदेखील त्यांना आढळून आल्या. पोलिसांनी दिलेल्या माहितीनुसार याच परिसरात महिलेच्या शरीराचे अन्य तुकडे टाकले असल्याची माहिती समोर येत आहे. या परिसरात शोधमोहीम सुरू केल्याची माहिती मांडवी पोलिसांनी दिली.