खोपोली, ता. १८ (बातमीदार) ः मार्चअखेरपर्यंत जास्तीत जास्त करवसुलीचे उद्दिष्ट गाठण्यासाठी खोपोली नगरपालिकेकडून मालमत्ता व पाणीपट्टी करवसुलीसाठी जोरदार मोहीम राबवण्यात येत आहे. नागरिकांकडूनही मोहिमेला चांगला प्रतिसाद मिळत असून, कर भरणा करण्यासाठी पालिकेत रांगा लागत आहेत.
पालिकेकडून थकबाकीदारांना नोटिसा बजावणे, नळजोडणी खंडित करणे आदी कारवाईही सुरू करण्यात आली आहे. कर भरणा अधिक सुलभ व्हावा, यासाठी शहरातील विविध रहिवासी भागात विशेष वसुली पथक नियुक्त करून कॅम्प लावून वसुली मोहीम तीव्र केली जात आहे. पालिका कार्यालयातही पाणीपट्टी व मालमत्ता कर भरणा सुरळीत व्हावा म्हणून अतिरिक्त खिडक्या सुरू केल्‍या आहेत. यात रोख रक्कम, धनादेश व डेबिट कार्ड व ऑनलाइन पद्धतीने कर भरण्याची सुविधा उपलब्‍ध करून दिली आहे. कारवाई टाळण्यासाठी नागरिकांनी लवकरात लवकर कर भरणा करून पालिकेला सहकार्य करावे, असे आवाहन प्रशासनाकडून करण्यात आले आहे. आठ दिवसांत दररोज सरासरी १० लाखांच्या वर करवसुली होत असल्याचे वसुली अधिकाऱ्यांनी सांगितले.

कोणतीही अप्रिय कारवाई टाळण्यासाठी नागरिकांनी तातडीने पाणीपट्टी व मालमत्ता कर भरावा. वर्षानुवर्षे थकबाकी असलेल्‍या मालमत्ताधारकांकडून विकसक व औद्योगिक क्षेत्रातील थकबाकीदारांकडून करवसुलीसाठी नगरपालिकेकडून मोहीम तीव्र करण्यात आली आहे. कर भरा, अन्यथा कारवाईला सामोरे जा, असा निर्वाणीचा इशारा नोटिशीद्वारे थकबाकीदारांना देण्यात आला आहे.
- डॉ. पंकज पाटील, मुख्याधिकारी, खोपोली

खोपोली : कर भरणा करण्यासाठी पालिका कार्यालयात गर्दी होत आहे.

(छायाचित्र : अनिल पाटील )