जंजिरे धारावी जतन समितीचा गौरव
किल्ला संवर्धनाच्या प्रयत्नामुळे गडपती पुरस्कार
भाईंदर, ता. १८ (बातमीदार) : उत्तनजवळील चौक गावात असलेल्या जंजिरे धारावी किल्ल्याच्या संवर्धनात महत्त्वाची भूमिका बजावत असलेल्या जंजिरे धारावी किल्ला जतन समितीचा विशेष गौरव करण्यात आला. ठाण्यातील महाराष्ट्र नवनिर्माण विद्यार्थी सेनेच्या वतीने शिवजयंती निमित्त ‘गडपती’ या विशेष कार्यक्रमाचे नुकतेच आयोजन डॉ. काशिनाथ घाणेकर नाट्यगृहात करण्यात आले होते. या कार्यक्रमात महाराष्ट्रातील कर्तृत्ववान ३० संस्थांचा सन्मान करण्यात आला. यामध्ये मिरा-भाईंदर शहरातील आपल्या जंजिरे धारावी किल्ला जतन समिती संस्थेची निवड करण्यात आली होती.
नरवीर चिमाजी आप्पांच्या वसई किल्ल्यावरील विजयाचा साक्षीदार असलेल्या जंजिरे धारावी किल्ल्याचे जतन व संवर्धन व्हावे यासाठी ही जतन समिती गेल्या आठ-नऊ वर्षांपासून प्रयत्न करत आहे.
-----------------------
समितीच्या प्रयत्नांना यश
किल्ल्याचे संवर्धन व्हावे, त्याची सुरक्षा राखण्यात यावी, यासाठी त्यांनी आंदोलने, महापालिका व राज्य सरकारकडे वारंवार पाठपुरावा करण्यात आला आहे. त्यांच्या या प्रयत्नाला यश येऊन अखेर किल्ल्याच्या सुशोभीकरणाच्या कामाला मान्यता मिळाली आहे.
----------------------------
या कामाची नोंद घेऊन समितीला गडपती सन्मानचिन्ह तसेच ११ हजार रुपये देऊन सन्मानित करण्यात आले आहे. महाराष्ट्र नवनिर्माण सेनेचे नेते अमित ठाकरे, अभिजीत पानसे, अविनाश जाधव, गजानन काळे, संदीप पाचंगे या सोहळ्याला उपस्थितीत होते. जंजिरे धारावी जतन समितीचे उपाध्यक्ष निखिल एकनाथ पाटील, साक्षी गुरव, राकेश कदम यांनी हा सन्मान स्वीकारला.