बिबट्याच्या हल्ल्यात कुत्रा ठार

टोकावडे, ता. २८ (बातमीदार) : मुरबाड तालुक्यातील जांभुर्डे गावाच्या हद्दीत बिबट्याने कुत्र्यावर हल्ला केल्याची घटना उघडकीस आली आहे. जांभुर्डे गावातील प्रकाश नारायण तरे यांच्या घराबाहेर बसलेल्या कुत्र्यावर बुधवारी (ता. २६) मध्यरात्रीच्या सुमारास बिबट्याने हल्ला करून त्याला फस्त केल्याची घटना घडली आहे. या घटनेने जांभुर्डे गाव परिसरात भीतीचे वातावरण पसरल्याची माहिती जांभुर्डे गावचे माजी सरपंच प्रकाश भोपी यांनी दिली. या घटनेमुळे वनविभागाच्या कर्मचाऱ्यांकडून जांभुर्डे गावात गस्त घालण्यात येत आहे. नागरिकांनी एकट्याने रात्रीच्या वेळी बाहेर पडू नये. रात्रीच्या वेळी घराचे दरवाजे व्यवस्थित बंद करावे, तसेच अंगणात किंवा घराच्या बाहेर उघड्यावर झोपणे टाळावे, असे आवाहन वनपरिक्षेत्र अधिकारी महेश शिंदे यांनी केले आहे.