कांदिवली परिसर भगवेमय
मुंबई, ता. ३० ः गुढीपाडवा शोभायात्रेमुळे कांदिवली पूर्वेतील पाेयसर परिसर भगवेमय झाला होता. प्रभू श्रीरामचंद्र की जय, छत्रपती शिवाजी महाराज की जय असा जयघोष, पारंपरिक वाद्यांचा निनाद, फटाक्यांची आतषबाजी, जागोजागी पुष्पवृष्टीने स्वागत अन् भगवे झेंडे, भगवे फेटेधारी नागरिकांच्या गर्दीने पोयसर परिसर फुलून गेला होता.
चौका-चौकात लहान मुला-मुलींचे नृत्‍य, साहसी मैदानी खेळांची प्रात्यक्षिके, महिलांचे समूह नृत्‍य, लेझीम पथक, वारकरी, वासुदेव यांचा फेर टिपण्यासाठी गर्दी होत होती. सामाजिक मंडळांनी जागोजागी नागरिकांसाठी सरबत व अल्पोपहाराची सोय केली होती. आकर्षक सजावट केलेल्या भव्य ट्रॉलीवर छत्रपती शिवाजी महाराज, झाशीची राणी लक्ष्मीबाई, विठ्ठल-रुक्मिणीचा देखावा व भव्य रथात प्रभू श्रीराम, लक्ष्मण आणि सीता माई अशा चित्ररथाने सार्वांचेच लक्ष वेधून घेतले.