नेरूळ, ता. ३ (बातमीदार) : सायन-पनवेल महामार्गावरील सानपाडा येथे एसटी संगणकीय आरक्षण केंद्र व प्रवासी निवारा शेडची बांधणी केली आहे. प्रवाशांच्या सोयीसाठी उभारण्यात आलेले हे केंद्र अद्यापही लोकार्पणाच्या प्रतीक्षेत आहे. त्यामुळे प्रवाशांची गैरसोय होत आहे. बंद असलेले आरक्षण केंद्राबाबत महाराष्ट्र राज्य परिवहन महामंडळाशी पत्रव्यवहार केला असता हे केंद्र मंडळाकडे हस्तांतरित केले नसल्याची बाब समोर आली आहे. त्यामुळे प्रवाशांच्या सोईसाठी आरक्षण केंद्र एसटीकडे त्वरित हस्तांतरित करावे, अशी मागणी सामाजिक कार्यकर्ते नीलेश कचरे यांनी केली आहे.
सायन-पनवेल महामार्गावरील वाढती प्रवाशांची लोकसंख्या पाहता राज्य परिवहन महामंडळाने नागरिकांच्या व प्रवाशांच्या सोयीकरता एसटी संगणकीय आरक्षण केंद्र व प्रवासी निवारा शेड सानपाडा येथील उड्डाणपूल शेजारी उभारण्यात आले आहे. आरक्षण केंद्र हे परिवहन विभागाच्या कामकाजाचा महत्त्वाचा भाग आहे. प्रवाशांना तिकीट बुकिंग व इतर सुविधा प्रभावीपणे पुरवण्यासाठी परिवहन विभागाकडे या केंद्राचा ताबा असणे आवश्यक आहे; परंतु गेले कित्येक महिने आरक्षण केंद्र प्रवाशांच्या सेवेत आले नसल्याचे निदर्शनास आले आहे. त्यामुळे परिवहन विभागाच्या प्रतिनिधींना आवश्यक त्या दस्तऐवजांसह केंद्राचा ताबा देण्यात यावा. या हस्तांतरित प्रक्रियेस गती देऊन प्रवाशांच्या सोयीसाठी त्वरित निर्णय घेण्यात यावा, अशी मागणी नीलेश कचरे यांनी केली आहे.