उल्हासनगर, ता. १० (वार्ताहर) : कॅम्प ३ येथील एका विकलांग हातगाडीवाल्याला जुन्या वादातून जबर मारहाण करण्यात आल्याची धक्कादायक घटना बुधवारी (ता. ९) रात्री घडली आहे. कुलदीप लबाना असे मारहाण झालेल्या व्यक्तीचे नाव आहे. पाच ते सहा जणांच्या जमावाने त्याच्या घरात घुसून बेदम मारहाण केली. हा संपूर्ण प्रकार सीसीटीव्ही कॅमेऱ्यामध्ये स्पष्टपणे कैद झाला आहे.
कुलदीप हा उल्हासनगरमध्ये पाया सूपची हातगाडी लावतो. काही दिवसांपूर्वी त्याला गाडी लावू नको, असा दम देण्यात आला होता. कुलदीप मुलाला शाळेत सोडण्यासाठी गेला असताना त्याच वेळी धमकी देण्यात आली. ‘हातगाडी दोन दिवसांत हटव, नाही तर घरात घुसून मारू’. मात्र, कुलदीपने हातगाडी बंद न करता काम सुरू ठेवले. त्याचा राग धरून काही संशयितांनी एकत्र येत त्याच्या घरीच घुसून त्याच्यावर हल्ला केला. याप्रकरणी कुलदीपने पोलिस ठाण्यात तक्रार दाखल केली असून, अद्याप अदखलपात्र गुन्हा नोंदवण्यात आला आहे. मात्र, आरोपींवर कठोर कारवाई व्हावी, अशी मागणी पीडित कुलदीप याने केली आहे.