नवी मुंबई विमानतळाच्या धावपट्टीवर ‘लॅम्बोर्गिनी’चा थरार!
सकाळ वृत्तसेवा
नवी मुंबई, ता. १० : नवी मुंबई येथे सिडकोच्या भागीदारीतून उभारण्यात येणाऱ्या नवी मुंबई आंतरराष्ट्रीय विमानतळाच्या (एनएमआयए) धावपट्टीवर काही दिवसांपूर्वी ‘लॅम्बोर्गिनी’ या स्पोर्ट कारचा थरार पाहायला मिळाला. स्पोर्ट्‌स कारसंबंधी माहिती प्रकाशित करणाऱ्या एका मासिकासाठी ही कार धावल्याचे सांगण्यात येत आहे. राज्य आणि केंद्र सरकारची परवानगी नसताना केवळ ‘एनएमआयए’ या कंपनीच्या परवानगीच्या आधारे ही कार धावल्याची माहिती नाव न छापण्याच्या अटीवर एका वरिष्ठ अधिकाऱ्याने ‘सकाळ’ला दिली.

मुंबई विमानतळावर येत असलेला ताण कमी करण्यासाठी नवी मुंबई येथे सिडको आणि अदाणी यांच्या भागीदारीतून जगातील सर्वात मोठे ग्रीनफिल्ड विमानतळ उभारले जात आहे. या विमानतळात अत्याधुनिक सोयी-सुविधा पुरविल्या जाणार आहेत. हे विमानतळ जूनमध्ये सुरू करण्यात येणार असल्याचे अदाणी समूहाचे अध्यक्ष गौतम अदाणी यांनी नुकते जाहीर केले होते. त्यानुसार या विमानतळावर धावपट्टी तयार असून, आतापर्यंत हवाई दलाच्या विमानांनी उड्डाण करून परीक्षण केले आहे. रडारदेखील बसवण्यात आले असून, केंद्रीय सुरक्षा संस्था या विमानतळाच्या सुरक्षेबाबत काळजी घेत आहेत. एवढी सुरक्षा बाळगली जात असताना या धावपट्टीवर ‘लॅम्बोर्गिनी’ ही स्पोर्ट कार धावली. याबाबत कारचालकाने आम्हाला एक्सक्लुझिव्‍ह परवानगी मिळाली आहे, असे व्हायरल व्हिडिओत म्हटले आहे. दरम्यान, कार चालवण्यासाठी दिलेल्या परवानगीचा वाणिज्यिक फायदा कंपनीला झाला नसल्याचे ‘एनएमआयए’च्या वरिष्ठ अधिकाऱ्याने ‘सकाळ’ला सांगितले. या व्‍हिडिओनंतर मासिकाला विमानतळाची धावपट्टी खासगी वापराची परवानगी द्यायचा अधिकार ‘एनएमआयए’ला आहे का, असा सवाल उपस्थित केला जात आहे.