खारघरमध्ये वाहतूक कोंडी
बेशिस्‍तपणे कोठेही गाड्या पार्क; रहिवाशांसह विद्यार्थी त्रस्त
खारघर, ता. १२ (बातमीदार) : शैक्षणिक शहर म्‍हणून खारघरकडे पाहिले जाते. मात्र मागील काही दिवसांपासून खारघरमध्ये वाहतुकीचा बोजवारा उडाला आहे. शहरात कोठेही गाड्या पार्क केल्या जात असल्याने सकाळ- सायंकाळ वाहतूक कोंडी होत आहे. त्‍यामुळे खारघरवासीयांना २० मिनिटांचे अंतर पार करण्यासाठी ४० ते ५० मिनिटे मोजावी लागत आहेत. शिवाय विद्यार्थ्यांना या वाहतूक कोंडीचा सर्वाधिक त्रास सोसाव लागत असल्याने नाराजी व्‍यक्‍त करण्यात येत आहे.
खारघर शहराच्या वाढत्या विकासामुळे लोकसंख्या आणि वाहनाच्या संख्येत दिवसेंदिवस भर पडत आहे. विशेष म्‍हणजे शहरामध्ये विविध ठिकाणी पार्किंगसाठी योग्य नियोजन करण्यात आले आहे. मात्र बेशिस्‍त वाहनचालकांकडून कोठेही गाड्या पार्क केल्या जात आहेत. यामध्ये मुख्य रस्‍त्यासह अतंगत रस्‍त्‍यावर कोठेही गाड्या पार्क केल्या जात असल्याने वाहतूक कोंडीत भर पडत आहे. हिरानंदानी पूल ओलांडून बँक ऑफ इंडिया सर्कलकडे जाताना या वाहतूक कोंडीचा त्रास वाहनचालकांना सोसावा लागत आहे. तसेच सेक्टर ११ आणि १२ रस्त्यावरून प्रवेश होताच नागरिकांना वाहतुकीला तोंड द्यावे लागत आहे. सकाळ सोसायटीकडून गोखले स्कुल आणि शिव मंदिरमार्गे घरकुलकडे जाणारा मुख्य रस्ता अरुंद आहे. या रस्त्यावर बेस्ट आणि एनएमएमटी बसेस धावतात. विशेष म्हणजे अरुंद रस्ता असताना दोन्ही बाजूला खरेदीसाठी आलेल्या ग्राहकांकडून गाड्या कशाही पार्क केल्या जात आहेत. अशीच परिस्‍थिती शिल्प चौकाकडून गोखले शाळेकडून जाणाऱ्या रस्त्याची आहे. या रस्त्याचा कडेला मोबाईल, रेडिमेड कापड, किराणा दुकान, बँका तसेच इतर दुकाने असल्यामुळे खरेदीसाठी येणारे ग्राहक तसेच दुकान मालक रस्त्याचा कडेला वाहने उभी करीत असल्यामुळे वाहतूक कोंडीत भर पडत आहे. वाहतूक विभागाने वाहनांवर कारवाई करून रस्ते मोकळे करावे, अशी मागणी खारघरवासीयांकडून केली जात आहे.
....................
खारघर वसाहत निर्माण झाल्यावर नवरंग सर्कल आणि गोखले शाळामार्गे शिल्प चौक, जलवायु विहार मार्गे बेस्ट आणि एनएमएमटी बसेस मोठ्या प्रमाणात धावतात. या रस्त्यावर होणाऱ्या वाहतूक कोंडीमुळे बेस्ट आणि एनएमएमटी प्रशासनाकडून हे मार्ग बंद करण्यात आले आहे. तर शिव मंदिर, डेली बाजार, जलवायू मार्गे बस वळविल्याने सेक्टर बारामधील नागरिकांना बस पकडण्यासाठी शिल्प चौक किंवा केंद्रीय विहार समोरील बस थांबा गाठावे लागत आहे.
...................
खारघरमधील सिग्नल यंत्रणा तसेच मुख्य वर्दळीच्‍या ठिकाणी वाहतूक पोलिस कार्यरत असतात. शिवाय वसाहतीमधील वाहतूक कोंडी करणाऱ्या वाहनांवर नियमितपणे कारवाई केली जाते.
- संतोष काणे, वरिष्ठ पोलिस निरीक्षक, वाहतूक शाखा खारघर.