उदय उतेकर यांना शिवछत्रपती पुरस्कार
सकाळ वृत्तसेवा
ठाणे, ता. १८ : टेकडी बंगला परिसरातील रहिवासी व रेल्वे कर्मचारी उदय उमेश उतेकर यांना वॉटरपोलोमधून राज्य सरकारचा क्रीडा क्षेत्रातील प्रतिष्ठेचा शिवछत्रपती क्रीडा पुरस्कार मिळाला आहे. महाराष्ट्र व रेल्वेच्या संघातून खेळताना उदय उतेकर यांनी आंतरराष्ट्रीय स्पर्धांवरही आपला स्वतंत्र ठसा उमटविला. भाजपचे माजी गटनेते नारायण पवार यांनी उतेकर यांची भेट घेऊन त्यांचे अभिनंदन केले. तसेच पुढील उज्ज्वल कारकीर्दीसाठी शुभेच्छा दिल्या. गेल्या १० वर्षांपासून उदय उतेकर यांनी अतुलनीय कामगिरी बजावत आहेत. त्यांच्या कामगिरीची दखल घेऊन त्यांना वॉटरपोलोमधील शिवछत्रपती क्रीडा पुरस्कार जाहीर झाला. वयाच्या चौथ्या वर्षी ते पोहण्यास शिकले. त्यानंतर त्यांनी १५व्या वर्षांपासून वॉटरपोलो खेळण्यास सुरुवात केली. त्यांची १८व्या वर्षी मध्य रेल्वे संघात निवड झाली. उदय उतेकर यांनी महाराष्ट्र व रेल्वेचे विविध स्पर्धांमध्ये प्रतिनिधित्व केले. २०१५ पासून झालेल्या राष्ट्रीय क्रीडा स्पर्धेत त्यांनी सुवर्ण, रौप्य व कांस्यपदकाची कमाई केली आहे. तर सिंगापूर व थायलंडमध्ये झालेल्या आंतरराष्ट्रीय स्पर्धेत त्यांनी भारताचे प्रतिनिधित्व केले.