भिवंडी, ता. २१ (बातमीदार) : शहरातील मौजे कामतघर येथील लोकवस्तीमध्ये असलेल्या एका कंपनीमधून होणाऱ्या प्रदूषणामुळे परिसरातील नागरिकांना विविध आजारांना सामोरे जावे लागत आहे. त्यामुळे पालिका आयुक्तांनी अशा कंपन्यांवर कायदेशीर कारवाई करावी, अशी मागणी रहिवाशांनी केली आहे.
मौजे- कामतघर येथील सर्व्हे क्रमांक १४७ व १४८ या जागेवरील बालाजी पोलिस्टर प्रा.लि. कंपनीमुळे मोठ्या प्रमाणावर प्रदूषण पसरत आहे. या प्रदूषणामुळे चंदनबाग, चौधरी कंपाउंड, कामतघर गाव, ओसवाल वाडी, साई प्रसन्न सोसायटी, राहुल नगर, वऱ्हाळ देवीनगर रहिवासी परिसर बाधित झाला असून, कंपनीमधून निघणाऱ्या धुरामुळे येथील लाखो रहिवाशांना त्रास होत आहे. कंपनीच्या मालकांनी सर्व सरकारी नियम डावलून रहिवासी झोनमधील जागेमध्ये रात्रंदिवस तीन पाळ्यांमध्ये कच्चा कपडा रंगीत करण्याचे काम सुरू असते. विविध रासायनिक पदार्थांचा उपयोग केला जात असल्याने मोठ्या संख्येने प्रदूषण होते. कच्चा कापड कलर करण्यासाठी कार्बन डायऑक्साइड, कार्बन मोनो ऑक्साइड, नायट्रोजन इत्यादी रासायनिक पदार्थांचा प्रयोग केला जातो. त्यामुळे परिसरातील नागरिकांना विविध आजाराला सामोरे जावे लागत आहे. तसेच सरकारी नियमांचे पालन होत नसल्याने बालाजी पोलिस्टर प्रा. लि. कंपनी त्वरित बंद करण्याची मागणी ज्येष्ठ माजी नगरसेवक नीलेश चौधरी यांनी पालिका आयुक्तांकडे केली आहे.