जव्हार, ता. २६ (बातमीदार) : तालुक्यातील हाकेच्या अंतरावरील जामसर हद्दीतील भरसटमेट रस्त्याकडेला एका २२ वर्षीय तरुणाचा अज्ञात व्यक्तीने खून करून तो पसार झाल्याची घटना घडली आहे. जामसर ग्रामदान मंडळ या भागातील मेंढ्याचा पाडा या गावात राहणारा सोमनाथ दिघे हा जव्हार शहरात एका दुकानात काम करीत होता. बुधवारी (ता. २३) सायंकाळी सुट्टी झाल्यावर तो घराकडे निघाला होता. रात्री आठ ते १२ वाजण्याच्या सुमारास त्याचा अज्ञात व्यक्तीने गळ्यावर धारधार शस्त्राने वार करीत जीवे मारून त्याला रस्त्याकडेला फेकून दिले. रात्री उशिरा घरच्यांना त्याचा मृतदेह आढळून आला. जव्हार पोलिसांनी अज्ञात आरोपीविरोधात गुन्हा दाखल केला आहे. पुढील तपास जव्हारचे पोलिस निरीक्षक किशोर मानभाव यांच्या मार्गदर्शनाखाली सुरू आहे.