खासदार सुनील तटकरेंनी केली आंबेवाडी ते निवी कालव्याची पाहणी
रोहा, ता. २६ (बातमीदार) ः कोलाड पाटबंधारे विभागाच्या आंबेवाडी ते निवी कालव्याची खासदार सुनील तटकरे यांनी नुकतीच पाहणी केली. या पाहणीदरम्यान शेतीला ऊर्जित अवस्थेत आणण्यासाठी शेवटच्या टोकापर्यंत कालव्याचे पाणी पोहोचविले पाहिजे, अशी सूचना तटकरे यांनी संबंधित विभागाला दिली.
या परिसरातील शेतीसाठी कालव्याचे पाणी गरजेचे आहे. त्‍यामुळे कालव्याच्या दुरुस्ती कामांची पाहणी करावी व पाण्यासंदर्भात प्रशासनाला सूचना कराव्यात, अशी मागणी बळीराजा फाउंडेशनच्या वतीने खासदार सुनील तटकरे यांच्याकडे केली होती. या मागणीची गांभीर्याने दखल घेत तटकरेंनी दुरुस्ती कामे पाहणी दौरा केला. अशोकनगर ते निवी भुवनेश्वरपर्यंतच्या कालव्याच्या विविध कामांची पाहणी केली. या वेळी कामाबद्दल पाटबंधारे प्रशासनाला सूचना केल्या. त्‍यानंतर काही काळात तिसे मुख्य मार्गातून कालव्याला पाणी सोडण्यात आले. कामाची माहिती घेत निवी हद्दीत शेवटपर्यंत पाणी पोहोचवण्याच्या सूचनाही खा. तटकरेंनी कार्य अभियंता मिलिंद पवार यांना दिल्या. तसेच परिसरातील ग्रामस्थांच्या कालव्यासंबंधी अडचणी दूर करण्याच्या दृष्टीने दुरुस्ती कामेही मार्गी लावा, असे या वेळी तटकरे यांनी अधिकारीवर्गाला सांगितले. या वेळी बळीराजा फाउंडेशनसह कार्यकारी अभियंता मिलिंद पवार, राष्ट्रवादी सरचिटणीस विजय मोरे, तालुकाध्यक्ष विनोद पाशिलकर, कार्याध्यक्ष समीर शेडगे, सरचिटणीस सुरेश मगर, बळीराजा फाउंडेशनचे अध्यक्ष विठ्ठल मोरे, संस्थापक राजेंद्र जाधव, उपाध्यक्ष तुकाराम भगत, सचिव दीपक भगतसह राष्ट्रवादीचे पदाधिकारी, शासकीय अधिकारी, परिसरातील ग्रामस्थ, शेतकरी मोठ्या संख्येने उपस्थित होते.