सिडकोच्या निविदा प्रक्रियेला स्थगिती

वाशी, ता. २६ (वार्ताहर) : वाशी येथील सेक्टर १९ एफमधील न्यू बॉम्बे मर्चंट्स कॉमन वेअरहाउस संस्थेला सिडकोने दिलेला भूखंड रद्द करून हा भूखंड निविदा काढून विक्रीस काढण्याच्या निर्णयाला मुख्यमंत्री देवेंद्र फडणवीस यांनी नुकतीच स्थगिती दिली आहे. या निर्णयामुळे व्यापाऱ्यांनी आनंद व्यक्त केला असून, व्यापाऱ्यांकडून या निर्णयाचे स्वागत करण्यात येत आहे.

सिडकोने १९९८ साली साडेनऊ एकर क्षेत्रफळाचा भूखंड वाशी येथे न्यू बॉम्बे मर्चंट कॉमन वेअरहाउस या संस्थेला दिला होता. ८६२ व्यापाऱ्यांनी गोदाम व कार्यालयासाठी या भूखंडासाठी पैसे भरले होते, मात्र लीज प्रीमियमबाबत सिडको व व्यापारी संघटनांमध्ये वाद निर्माण झाला होता. नंतर अतिरिक्त २.८१ कोटी रुपये भरल्यानंतरही सिडकोने भूखंडासाठी ६४ कोटी रुपयांचा प्रीमियम भरण्याची मागणी केली. त्यामुळे संस्था न्यायालयात गेली. हा मुद्दा अद्याप न्यायप्रविष्ट असताना, सिडकोने भूखंडाचा ताबा घेऊन या भूखंडाच्या विक्रीसाठी निविदा प्रक्रिया सुरू केली होती. सिडकोच्या या निर्णयाविरोधात संस्थेचे संचालक मोहन गुरनानी यांच्या नेतृत्वाखालील शिष्टमंडळाने मुख्यमंत्र्यांची भेट घेतली. त्यानंतर मुख्यमंत्र्यांनी तातडीने सिडकोला कंत्राट प्रक्रिया रद्द करण्याचे आदेश दिले.