पालिकेकडून पादचारी पुलांच्या डागडुजीला सुरुवात
कोपरखैरणे, पावणेे येथील रहिवाशांना दिलासा
वाशी, ता. २८ (बातमीदार) ः ठाणे-बेलापूर मार्गावरील चिंचपाडा, रबाळे, बोनकोडे, कोपरखैरणे, पावणे, तुर्भे येथील सहा पादचारी पुलांची दयनीय अवस्था झाली होती. यामुळे नवी मुंबई महापालिकेकडून या पादचारी पुलांची दुरुस्ती करण्यात येणार आहे. सद्यस्थितीत पावणे आणि कोपरखैरणे येथील पादचारी पुलांच्या दुरुस्तीचे काम सुरू आहे. तर मॉन्सून पूर्व या दोन्ही पादचारी पुलांच्या दुरुस्तीचे काम पूर्ण होऊन मॉन्सूनमध्ये त्‍याचा वापर करता येणार आहे. कोपरखैरणे व पावणे येथील पादचारी पुलांच्या दुरुस्तीमध्ये रंगरंगोटी, पत्रे, विद्युत रोषणाई आदींची कामे करण्यात येणार आहेत.
ठाणे-बेलापूर मार्गावर पादचाऱ्यांना रस्ते ओलांडण्यासाठी पालिका, एमआयडीसी यांच्या माध्यमातून पादचारी पूल बांधण्यात आला आहे; मात्र या पुलाची मागील काही दिवसांपासून दयनीय अवस्‍था झाली होती. या पादचारी पुलामधील विद्युत दिवे मागील काही दिवसांपासून बंद अवस्थेत होते. तर काही पादचारी पुलाच्या लाद्या निखळून गेल्या आहेत. काहींच्‍या छताला भेगा पडल्या असून पावसाळ्यात गळती सुरू राहणार आहे. त्यामुळे पावसाळ्यात पादचाऱ्यांना या नादुरुस्‍त पुलावरून प्रवास करणे जिकिरीचे होणार आहे. त्यामुळे पालिकेच्या माध्यमातून या पादचारी पुलांची सुधारणा करण्यात येत आहे. सद्यस्थितीत पावणे आणि कोपरखैरणे येथील पादचारी पुलांच्या दुरुस्तीचे काम जोरात सुरू आहे. या उड्डाणपुलाच्या दुरुस्तीमध्ये रंगरंगोटी तसेच पत्रे, लाद्या बसवण्यात येत आहेत. त्यामुळे पावणे व कोपरखैरणे येथे रस्ता ओलांडणाऱ्या पादचाऱ्यांचा प्रवास सुसह्य होणार आहे. तर रबाळे, चिंचपाडा, पावणे, तुर्भे येथील पादचारी पुलांची दुरुस्ती ही पुढील टप्प्यात करण्यात येणार आहे.
.....................
ठाणे-बेलापूर मार्गावरील पादचारी पुलांची दयनीय अवस्था झाल्यामुळे पादचाऱ्यांना त्रास सहन करावा लागत आहे. तर पालिकेच्या सुशोभीकरण अभियानालादेखील याचा फटका बसत आहे. त्‍यामुळे पादचारी पुलांची दुरुस्ती करण्यात येत आहे. सद्यस्‍थितीत कोपरखैरणे व पावणे येथील पादचारी पुलांच्या दुरुस्तीचे काम सुरू आहे. टप्प्याटप्प्याने दुसऱ्याही पादचारी पुलांचे काम सुरू करण्यात येईल.
- शिरीष आरदवाड, शहर अभियंता, नवी मुंबई महापालिका