वाशी, ता. ७ (बातमीदार) : आजच्या काळात पर्यावरण संरक्षण व संवर्धनाचे महत्त्व जाणून हरित इमारत अर्थात ग्रीन बिल्डिंग संकल्पना प्रभावीपणे राबवण्यासाठी नवी मुंबई महापालिका प्रयत्नशील आहे. यामधून शाश्वत शहरी नियोजनाला प्रोत्साहन मिळावे या दृष्टीने नवी मुंबई महापालिकेच्या मुख्यालयात महापालिका आयुक्त डॉ. कैलास शिंदे यांच्या मार्गदर्शनाखाली ‘ग्रीन सिटी, ग्रीन बिल्डिंग’ या विशेष कार्यशाळेचे आयोजन करण्यात आले होते.
आयजीबीसी या मान्यताप्राप्त संस्थेच्या माध्यमातून शहर अभियंता शिरीष आरदवाड यांच्या समन्वयातून नवी मुंबई महापालिका मुख्यालयातील ज्ञान केंद्रामध्ये एकदिवसीय कार्यशाळा आयोजित करण्यात आली होती. प्रसंगी प्रशासन विभागाचे उपआयुक्त शरद पवार, सहाय्यक संचालक नगररचना सोमनाथ केकाण, अतिरिक्त शहर अभियंता अरविंद शिंदे, कार्यकारी अभियंता राजेश पवार, नामांकित वास्तुविशारद तथा आयजीबीसीचे नवी मुंबई अध्यक्ष हितेन सेठी व महापालिकेचे सर्व विभागातील अभियंते आणि वास्तुविशारद व बांधकाम व्यावसायिक उपस्थित होते. आयजीबीसीच्या वतीने या एकदिवसीय कार्यशाळेत असो. कौन्सिलर गार्गी दास, अस्फिया तैमूर, राजा रेड्डी, विक्रम सिंघा यांनी हरित इमारतीविषयक विविध विषयांवर मार्गदर्शन केले. आयजीबीसी पदाधिकाऱ्यांनी महापालिका आयुक्त डॉ. कैलास शिंदे यांची भेट घेत त्यांना हरित इमारतीविषयक विशेष माहिती पुस्तिका प्रदान केली. या वेळी मान्यवर उपस्थित होते.

----------------------
पर्यावरण संवर्धन व संरक्षणाचे ध्येय
आयजीबीसीने विकसित केलेली रेटिंग प्रणाली नागरी शाश्वततेमध्ये सुधारणा करण्याच्या संधींचे मूल्यांकन करते. ज्यामध्ये पर्यावरण संरक्षण व संवर्धन, नागरिक कल्याण, भूमी वापराचे नियोजन, नागरी वाहतूक, पायाभूत सुविधांचे व्यवस्थापन, शहर नियोजनातील नावीन्यपूर्णता अशा विविध बाबींचा समावेश होतो. त्यादृष्टीने या कार्यशाळेच्या माध्यमातून ग्रीन बिल्डिंग संकल्पना विशद करीत त्याचा अंगीकार करण्याच्या दृष्टीने सर्वांगीण माहिती देण्यात आली.