अवकाळी पावसाने आजारांची भीती
ठाणे शहर, ता. ७ (बातमीदार) : अवकाळी पावसाने ठाणेकर सुखावले असले तरी वातावरण बदलामुळे अनेक आजारांनादेखील निमंत्रण मिळणार आहे. यासाठी जिल्हा आरोग्य यंत्रणा सज्ज झाली आहे. व्हायरल फिवर, सर्दी-खोकला, उलटी-जुलाब या संभाव्य आजारांची बाधा झालेल्या रुग्णांसाठी सामान्य जिल्हा रुग्णालयाचा बाह्य रुग्ण विभाग अधिक सतर्क ठेवण्यात येणार आहे. तसेच सामान्य वॉर्डसह लहान मुलांचे वॉर्ड तयार ठेवले आहेत.

मंगळवारी (ता. ६) रात्री सुटलेला सोसाट्याचा वारा आणि बुधवारी (ता. ७) सकाळी पडलेल्या मुसळधार पावसाने ठाणेकर सुखावले आहेत, परंतु हाच अवकाळी पाऊस आता काही आजारांनाही घेऊन येणार आहे. ठाणे जिल्हा सामान्य रुग्णालयातील डॉ. श्रीजीत शिंदे यांनी दिलेल्या माहितीनुसार पाऊस गेल्यानंतर वाढलेल्या तापमानामुळे काही आजाराचे रुग्ण वाढणार असल्याची शक्यता आहे.

उलट्या-जुलाब, सर्दी-खोकला, व्हायरल फिवर यांसारख्या आजाराचे रुग्ण वाढणार असण्याची शक्यता असल्यामुळे नागरिकांनी विशेष काळजी घ्यायची आहे. गेल्या काही महिन्यांपासून वातावरणातील तापमान प्रचंड वाढलेले असताना बुधवारी सकाळी अवकाळी पाऊस झाला. या पावसामुळे वातावरणात काहीसा गारवा आणि जमिनीत काही प्रमाणात पाणी मुरलेले असले तरी हेच मुरलेले पाणी आता वाफ होऊन वातावरणात आणखी उष्णता निर्माण करणार आहे. अवकाळी पावसाने आलेला गारवा आणि त्यानंतर पडलेल्या कडक उन्हामुळे तयार झालेल्या वातावरणामुळे काही आजारांना पोषक वातावरण मिळणार आहे, परंतु नागरिकांनी घाबरून न जाता अधिक सजक राहायला पाहिजे, असे आवाहन डॉ. श्रीजीत शिंदे यांनी केले आहे.

संभाव्य आजार :
उलट्या, जुलाब, सर्दी, खोकला, व्हायरल फिवर, दम लागणे, श्वसनाचे आजार, घामोळ्या, त्वचा लाल होणे, डोळ्यांची जळजळ आदी.

अशी घ्या काळजी :
पाणी उकळून प्यावे, वेळेवर जेवावे, सकस साधा आहार घ्यावा, फ्रीजमधील शिळे अन्न खाऊ नये, भरपूर पाणी पीत राहावे, डॉक्टरांच्या सल्ल्याशिवाय औषधे घेऊ नयेत.