उल्हासनगर, ता. ७ (बातमीदार) : मागच्या महिन्यात शेतकऱ्यांना कर्जमाफी आणि शेतमालाला हमीभाव देण्यात यावी; तसेच दिव्यांगांना मासिक सहा हजार रुपये मानधन मिळावे, यासाठी माजी आमदार बच्चू कडू यांच्या प्रहार जनशक्ती पक्षाच्या वतीने राज्यामधील सत्ताधारी आमदारांच्या कार्यालयासमोर आंदोलन केले होते. आता बच्चू कडू यांनी धर्मवीर छत्रपती संभाजी महाराज यांच्या जयंती पर्वावर १४ मे रोजी महाराष्ट्रातील सर्व कॅबिनेट व राज्यमंत्र्यांच्या घरासमोर रक्तदान करण्याचे जाहीर केले आहे. तसे आदेश त्यांनी जिल्हाप्रमुख, तालुकाप्रमुख, शहरप्रमुखांना दिले आहेत. या आदेशान्वये उल्हासनगरात राहणारे प्रहारचे ठाणे जिल्हाप्रमुख ॲड. स्वप्नील पाटील हे ठाण्याची जबाबदारी पार पाडणार आहेत.
ज्यांच्या जिल्ह्यामध्ये एकही मंत्री नाही, अशांनी आपल्या बाजूच्या जिल्ह्यातील सर्व कॅबिनेट मंत्री व राज्यमंत्री यांच्या घराजवळ रक्तदान शिबिर घ्यावेत. आधी देवदर्शन घेऊन, टाळ मृदंग वाजवत भजन कीर्तनाच्या माध्यमातून शेतकरी कर्जमाफी मिळावी, याकरीता जन जागरण जागृती आंदोलन करायचे आहे. हे आंदोलन प्रहार स्टाईलने अधिक प्रभावी कसे होईल, याकडे प्रत्येक प्रमुख, सक्रिय व सर्व कार्यकर्त्यांनी लक्ष द्यावे. पक्षातील जे पदाधिकारी या आंदोलनात सहभागी होणार नाहीत, त्यांची नावे पाठवावीत, असे सांगण्यात आले. केलेल्या आंदोलनाचे फोटो व व्हिडिओ संजय गोमकाळे आणि भास्कर मासूतकर यांना व्हाॅट्सॲप करण्याच्या सूचना देण्यात आल्या आहेत.
यासंदर्भात प्रहार जनशक्ती पक्षाचे ठाणे जिल्हाप्रमुख ॲड. स्वप्नील पाटील यांच्याशी संपर्क साधला असता १४ मे रोजी धर्मवीर छत्रपती संभाजी महाराज यांची जयंती आहे. या दिवशी महाराष्ट्रातील सर्व कॅबिनेट व राज्यमंत्र्यांच्या घरासमोर शेतकऱ्यांना कर्जमाफी व शेतमालाला हमीभाव आणि दिव्यांगांना सहा हजार रुपये मानधन या मागणीसाठी बच्चू कडू यांनी आदेश दिले आहेत. त्यानुसार ठाण्यात उपमुख्यमंत्री एकनाथ शिंदे यांच्या घरासमोर रक्तदान शिबिर आयोजित करण्यात येणार असल्याची माहिती ॲड. पाटील यांनी दिली.