खारघरमध्ये ट्रॅव्हल्सची अवैध पार्किंग
घातपात होण्याची शक्‍यता; नागरिकांकडून कारवाईची मागणी
खारघर, ता. ७ (बातमीदार) : खारघर सेक्टर २७ ते ३५ परिसरात मोठ्या प्रमाणात रस्त्यावर अनधिकृतरित्या बाहेरगावी जाणाऱ्या ट्रॅव्हल्सची पार्किंग करण्यात येत आहे. त्‍यामुळे पुणे स्वारगेटसारख्या घटनेची खारघरमध्ये पुनरावृत्ती होऊ नये, म्‍हणून या ट्रॅव्‍हल्सवर कारवाई करण्यात यावी, अशी मागणी खारघरवासीयांकडून करण्यात येत आहे.
खारघर सेक्टर २७ मधील रांजणपाडा, ओवेपेठ तसेच ओवे गावालगत रस्त्याच्या कडेला मोठ्या प्रमाणात अनधिकृतपणे ट्रॅव्हल्स उभ्या केल्या जात आहेत. यामध्ये बहुतांश वाहने ही मुंबई परिसरातील आहेत, तर त्‍यामध्ये काम करणारे कर्मचारीदेखील मुंबई, ठाणे आदी भागातील आहेत. काही दिवसांपूर्वी आदर्श सेवा भावी संस्थेचे उपाध्यक्ष मेघनाथ ठाकूर यांनी वाहतूक पोलिस उपायुक्तांना पत्र देऊन रस्त्यावर उभ्या केल्या जाणाऱ्या अनधिकृत वाहनांवर कारवाई करण्याची मागणी केली होती. स्थानिक रहिवाशांकडून मिळालेल्या माहितीनुसार, ट्रॅव्हल्समधील वाहनचालक हे रात्रीच्या वेळी वाहनात मुक्कामी असतात. विशेष म्हणजे या रस्त्यावरून रात्रीच्‍यावेळी महिलावर्गाची ये-जा असते. त्‍यातच रस्‍त्यावरील वर्दळ रात्री ९ नंतर अत्‍यंत कमी होते. त्‍यामुळे महिलावर्गासाठी हा परिसर धोकादायक झाला असल्याचे सांगण्यात येत आहे. काही दिवसांपूर्वी पुण्यातील स्वारगेट बस आगारात एका मुलीवर अत्‍याचार झाल्याची घटना घडली होती. अशा घटनांची पुनरावृत्ती होऊ नये म्‍हणून, याची दखल घेऊन वाहतूक विभागाने या वाहनांवर कारवाई करावी, अशी मागणी स्‍थानिकांकडून करण्यात येत आहे.
...............
रांजनपाडा तळोजा रस्त्यावर अनधिकृतपणे उभ्या केला जाणाऱ्या ३८३ वाहनांवर कारवाई करण्यात आली आहे. तसेच पनवेल पालिका प्रशासनास पत्र पाठवून रस्त्याच्या दोन्ही बाजूला नो पार्किंगचे फलक लावण्यात यावेत, यासाठी पत्रव्यवहार करण्यात आला आहे.
- संतोष काणे, वरिष्ठ पोलिस निरीक्षक खारघर वाहतूक शाखा.