भिवंडी, ता. ८ (वार्ताहर)ः पहलगाम अतिरेकी हल्ल्याचे भारतीय सैन्याने ऑपरेशन सिंदूरच्या माध्यमातून पाकिस्तानला प्रत्युत्तर दिलेले असताना, शहरातील एका युवकाने मोबाईलवर पाकिस्तानचे समर्थन केले होते. याप्रकरणी अफसर अली अजगर अली शेखला घुंगटनगर येथून अटक केली आहे.
भारतीय सैन्याने पाकिस्तानी अतिरेक्यांवर बुधवारी कारवाई केली. संपूर्ण देशवासीयांकडून या कारवाईचे स्वागत केले जात आहे. असे असताना शहरातील घुंगटनगर भागातील अफसर अली अजगर अली शेखने (वय १८) मोबाईलवर ‘चाहें जो हो जाये सपोर्ट तो बस पाकिस्तान को करेंगे’ असा देशविरोधी संदेश ठेवला होता. या प्रकरणात शहर पोलिस ठाण्यात तक्रार दाखल केल्यानंतर रात्री उशिरा युवकाला ताब्यात घेण्यात आले आहे. त्याच्या विरोधात कलम १५२ प्रमाणे देशद्रोहाचा गुन्हा दाखल करून अटक केल्याची माहिती कृष्णदेव खराडे यांनी दिली.