शूटिंग पाहण्यासाठी गेलेल्या मुलीला रात्रभर दुकानात डांबून लैंगिक अत्याचार
कल्याणजवळील आंबिवली परिसरात ११ वर्षीय मुलीसोबत दुकानदाराचे दुष्कृत्य
सकाळ वृत्तसेवा
डोंबिवली, ता. ९ ः शूटिंग बघण्यासाठी गेलेल्या अल्पवयीन मुलीला रात्रभर दुकानात डांबून तिच्यावर लैंगिक अत्याचार केल्याची घटना उघडकीस आली आहे. कल्याणजवळील आंबिवली परिसरात ही घटना घडली असून, याप्रकरणी पीडित मुलीच्या आईच्या तक्रारीवरून खडकपाडा पोलिस ठाण्यात दुकानदार गणेश म्हात्रे (वय २१) याच्या विरोधात गुन्हा दाखल केला आहे. पोलिसांनी आरोपीला अटक करत पुढील तपास सुरू केला आहे.
तक्रारीनुसार, आंबिवली स्थानक परिसरात पीडित मुलीचे कुटुंब राहात असून, त्यांचा भाजीविक्रीचा व्यवसाय आहे. सोमवारी रात्री ८च्या सुमारास पीडित मैत्रिणीकडे जाते सांगून घरातून निघाली, परंतु खूप वेळ झाला तरी ती परत न आल्याने आई-वडिलांनी तिचा शोध घेतला, मात्र ती दिसून आली नाही. दुसऱ्या दिवशी मंगळवारी (ता. ६) सकाळी ही मुलगी त्याच परिसरात आढळून आली. विश्वासात घेऊन तिच्या कुटुंबीयांनी विचारपूस केली असता तिने रात्रभर घडलेला प्रसंग सांगितला.
आंबिवली येथील काळू नदीकिनारी शूटिंग सुरू होती. हे पाहण्यासाठी ही अल्पवयीन मुलगी त्या ठिकाणी गेली होती. याच परिसरातच गणेश म्हात्रे याचे किराणा मालाचे दुकान आहे. गणेशने मुलीला दुकानात बोलवत तेथे थांबायला सांगितले. मुलीने नकार देताच त्याने जबरदस्ती तिला दुकानात खेचून शटर बंद केले. आरडाओरडा केला तर तुला मारेल व तुझी बदनामी होईल, अशी धमकी त्याने मुलीला दिली. त्यानंतर त्याने तिच्यावर दोनदा लैंगिक अत्याचार केला.