ठाणे-बेलापूर मार्गाच्या काँक्रीटीकरणासाठी वाहतूक व्यवस्थेत बदल
तुर्भे, ता. ९ (बातमीदार) ः ठाणे-बेलापूर मार्गावरील तुर्भे येथील आयकियासमोर रस्त्याचे काँक्रीटीकरणाचे काम सुरू झाले आहे. या ठिकाणी वाहतूक कोंडी होऊ नये, त्यासाठी या मार्गावरील वाहतूक व्यवस्थेत बदल करण्यात आला आहे, अशी माहिती तुर्भे वाहतूक शाखेचे पोलिस निरीक्षक सतीश जाधव यांनी दिली.
काँक्रीटीकरणाचे काम १६ मेपर्यंत चालू राहणार असून यादरम्यान सर्व वाहनचालकांनी प्रवासाची गैरसोय आणि वाहतूक कोंडी टाळण्यासाठी पर्यायी मार्गाचा वापर करावा. नागरिकांनी नवी मुंबई पोलिसांना सहकार्य करावे, असे आवाहन नवी मुंबई पोलिस वाहतूक विभाग यांच्याकडून करण्यात आले आहे.
पर्यायी मार्ग
१. ठाण्याकडून येणाऱ्या वाहनांनी अग्निशामक सिग्नल महापे येथील पुलावरून सेक्टर २६ एपीएमसी पामबीच या पर्यायी मार्गाचा वापर करावा.
२. ठाण्याकडून येणाऱ्या जड-अवजड वाहनांनी अग्निशामक सिग्नल महापे या ठिकाणाहून डावे वळण घेऊन तसेच सविता केमिकल पुलाखालून डावे वळण घेऊन तुर्भे एमआयडीसी मार्गाचा वापर करावा.