अलिबागमध्ये नालेसफाईच्या कामांना वेग
अलिबाग, ता. ११ (वार्ताहर)ः मुसळधार पावसाच्या वेळी शहरात अनेक ठिकाणी पाणी साचल्याचे प्रकार घडतात. त्यामुळे पावसाळ्याआधी नगर परिषदेकडून शहरात नालेसफाईची कामे हाती घेतली आहेत.
दरवर्षी मुसळधार पावसाच्या वेळी शहरात ठिकठिकाणी सखल भागात पाणी साचल्याने जनजीवन विस्कळित होते. यामध्ये पीएनपी नगर, एसटी स्टॅंड, कोळीवाडा, बायपास रोड परिसर अशा अनेक ठिकाणी पाणी साचून दुकानांमध्येही शिरते. त्याप्रमाणे अनेक रस्त्यांवर पाणी साचल्याने वाहतुकीस अडथळा निर्माण होतो. त्यामुळे पावसाळ्याआधी नगर परिषदेच्या वतीने नालेसफाईच्या कामांना सुरुवात केली जाते. यावर्षी पावसाचे आगमन लवकर म्हणजेच मे महिन्याच्या अखेरीस होणार आहे. त्यामुळे शनिवार (ता. १०)पासून शहरात नालेसफाई करण्यास सुरुवात केली आहे.

कचरा रस्त्याच्या कडेलाच
नालेसफाईच्या कामानंतर सर्व कचरा रस्त्याच्या कडेलाच ठेवण्यात आला आहे. त्यामुळे वाहतुकीला अडथळा निर्माण होत आहे. त्याचप्रमाणे दुर्गंधीही पसरली आहे. याबाबत तातडीने कार्यवाही करण्याची मागणी होत आहे. नालेसफाई करताना स्वच्छता कामगार कोणतीही सुरक्षा साधने वापरताना दिसत नाहीत. त्यामुळे त्यांच्या आरोग्याबाबत प्रश्नचिन्ह उपस्थित होत आहे.