सहकारी गृहनिर्माण संस्था स्वयंपुनर्विकास गटाची बैठक संपन्न
वसई-विरार आणि पालघर जिल्ह्यासाठी समन्वयक म्हणून स्नेहा दुबे पंडित यांची नियुक्ती जाहीर
विरार, ता.१२ (बातमीदार) ः विधान परिषद गटनेते प्रविण दरेकर यांच्या अध्यक्षतेखाली सहकारी गृहनिर्माण संस्था स्वयंपुनर्विकास गटाची पहिली महत्त्वाची बैठक रविवारी (ता. ११) वांद्रे येथील म्हाडा मुख्यालयात पार पडली.
या बैठकीत वसई-विरार महानगरपालिका क्षेत्रातील मागील ३ वर्षांत अत्यंत धोकादायक (C-१) प्रकारात मोडलेल्या २०० इमारतींचा मुद्दा वसईच्या आमदार स्नेहा दुबे पंडित यांनी उपस्थित केला. या इमारतींचा पुनर्विकास रखडल्याने हजारो कुटुंबांवर बेघर होण्याचे संकट असल्याचे त्यांनी या बैठकीत मांडले.
प्रामुख्याने या महत्त्वपूर्ण विषयावर चर्चेदरम्यान प्रवीण दरेकर यांनी स्नेहा दुबे पंडित यांची वसई-विरार आणि पालघर जिल्ह्यासाठी समन्वयक म्हणून नियुक्ती जाहीर केली आहे. तसेच, नवी मुंबई-पनवेलसाठी आमदार प्रशांत ठाकूर यांची नियुक्ती करण्यात आली. त्यामुळे आता वसई-विरारसह नवी मुंबईमधील अडकलेले प्रकल्प मार्गी लागण्यासाठी शासन स्तरावर ठोस व प्रभावी पावले उचलली जातील आणि लवकरच याचा अहवाल तयार करून त्याच्या अंमलबजावणीलाही गती दिली जाईल, असे मानण्यात येत आहे.