खारघर, ता. १२ (बातमीदार) : खारघरमधील सिडकोच्या समाजमंदिरात अनेक वर्षांपासून सुरू असलेल्या पाणी गळतीमुळे समाजमंदिर कमकुवत झाले आहे. काही दिवसांपूर्वी स्लॅब कोसळल्याची घटना घडली होती. समाजमंदिरामध्ये असलेल्या आरोग्य केंद्रात रुग्णांची वर्दळ असते. शिवाय, या ठिकाणी दिव्यांग मुलांची शाळा सुरू असते. त्यामुळे सिडको आणि पालिकेने समाजमंदिराची तातडीने दुरुस्ती करावी, अशी मागणी रहिवाशांकडून केली जात आहे. खारघर सेक्टर १२ येथील शिवमंदिराच्या शेजारी असलेल्या सिडकोच्या समाजमंदिरात अनेक वर्षांपासून पुरंदरे स्नेह ग्रंथसंग्रहालयाचे वाचनालय, केरळा समाज, तेजस्विनी महिला मंडळ यांची कार्यालये आहेत. समाजमंदिरामध्ये पालिकेने बाळासाहेब ठाकरे आपला दवाखाना सुरू केला आहे. त्यामुळे सकाळी १० ते रात्री १० या वेळेत रुग्ण उपचारासाठी येत असतात. या ठिकाणी दिव्यांग मुलांची शाळा सुरू आहे. समाजमंदिराच्या छतावर असलेली पाण्याची टाकी भरल्यास समाजमंदिराच्या छतातून पाणी गळत असते. विशेष म्हणजे, पावसाळ्यात समाजमंदिराला गळती लागते. काही दिवसांपूर्वी पालिकेच्या आरोग्य केंद्राच्या खोलीसमोर छत कोसळल्याची घटना घडली होती. रुग्ण रक्त तपासणीसाठी खोलीत प्रवेश करताच छत कोसळल्याची घटना घडली होती.
----------------
स्ट्रक्चरल ऑडिट करा!
पुढील महिन्यात पावसाळा सुरू होणार आहे. पाणी गळतीमुळे समाजमंदिर निकृष्ट दर्जाचे झाले असून पालिकेने तातडीने स्ट्रक्चरल ऑडिट करून दुरुस्ती करावी, अशी मागणी खारघरवासीयांकडून केली जात आहे. विशेष म्हणजे, नुकतेच सिडकोने समाजमंदिर पालिकेकडे हस्तांतरित केले आहे. त्यामुळे पालिकेला समाजमंदिर दुरुस्तीकडे लक्ष द्यावे लागणार आहे. याविषयी पालिकेच्या मुख्य आरोग्य अधिकारी डॉ. आनंद गोसावी यांच्याकडे विचारणा केली असता हे समाजमंदिर पालिकेकडे हस्तांतरित झाले असेल तर अभियांत्रिकी विभागाला सांगून दुरुस्तीचे काम हाती घेतले जाईल, असे सांगितले.
-------------------
समाजमंदिराला गळती लागली आहे. ग्रंथालयात मुले अभ्यास करीत असतात. पुढील महिन्यात पावसाळा सुरू होणार आहे. समाजमंदिराच्या गळतीसंदर्भात पालिकेकडे पत्रव्यवहार केला आहे. त्यानंतर पालिकेच्या अभियांत्रिकी विभागाच्या अधिकाऱ्यांनी पाहणी केली होती; मात्र पुढे कोणतीही कार्यवाही झाली नाही.
- संजय जाधव, संस्थापक, पुरंदरे स्नेह ग्रंथसंग्रहालय, खारघर