नाले, गटारांची कामे अपूर्णावस्थेत
कल्याण, ता. १३ (वार्ताहर) : एमआयडीसी निवासीमध्ये काँक्रीट रस्ते काम पूर्ण झाल्यानंतर सध्या एमआयडीसीकडून नव्याने नाले, गटारे, भूमिगत सांडपाणी वाहिन्या बांधण्याची कामे केली जात आहेत. येत्या पावसाळ्यापूर्वी ती पूर्ण होतील का, असा प्रश्न येथील नागरिक करत आहेत. अनेक ठिकाणी नाले, गटारांची कामे एमआयडीसी ठेकेदारांकडून सुरू आहेत; मात्र ही कामे महिनाभरापासून बंद पडली आहेत.

नाले, गटार कामाच्या वेळी एमआयडीसी ठेकेदाराला तांत्रिक अडचणी आल्या आहेत, तर काही ठिकाणी मोठी झाडे, सांडपाणी वाहिन्या चेंबर्स व वीजवाहिन्यांचा अडथळा आला आहे. ही कामे सुरू करण्याआधी एमआयडीसी आणि ठेकेदाराने सर्वेक्षण करणे आवश्यक होते. तसेच महावितरण, महानगर गॅस, केडीएमसी इत्यादीशी समन्वय साधणे गरजेचे होते. नालेसफाईची कामे रस्त्याच्या काँक्रीटीकरणाआधी होणे गरजेचे होते. तसे एमआयडीसीचे नियोजन होते.

तीन वर्षांपूर्वी काँक्रीट रस्ते होण्यापूर्वी नवीन नाले, गटारांसाठी काही कोट्यवधी रुपयांच्या निधीची कामे मंजूर झाली होती. एमआयडीसी निवासी भागात ही कामे सुरू करण्यात आली होती. यात सर्व नाले, गटारांची कामे पूर्ण होणार होती; मात्र दुर्दैवाने ही कामे त्यावेळेच्या एमआयडीसी ठेकेदारांकडून पूर्ण झाली नाहीत. हे बांधलेले नाले, गटारांची कामे त्या वेळी निकृष्ट दर्जाची झाली होती. याची माहिती तत्कालीन एमआयडीसी अधिकारी आणि लोकप्रतिनिधींना देण्यात आली होती. नाले, गटारांच्या कामांसाठी हा आलेला कोट्यवधींचा निधी कमी पडल्याचे कारण त्या वेळी प्रशासनाकडून सांगण्यात आले होते.

पावसाळ्यात पुराची भीती
काही ठिकाणी नाल्यात रॅबीट, सिमेंट राडारोडा, कचरा पण टाकला जात आहे. त्यामुळे पावसाळ्यात पाण्याचा प्रवाह हा अडला जाणार आहे. या नाले, गटारांची कामे पावसाळ्यापूर्वी पूर्ण झाली नाहीत, तर मोठी आपत्ती, दुर्घटना, पूरसदृश स्थिती निर्माण होण्याची शक्यता आहे. सुदर्शन नगर, पोटोबा हॉटेल, मिलापनगर तलाव रस्ता, सर्व्हिस रस्ता, कावेरी चौक, चार बिल्डिंग इत्यादी परिसरातील कामे अपूर्णावस्थेत आहेत. यामुळे येथील काही रहिवाशांना आपली वाहने रस्त्यावर उभी करावी लागत आहेत, तसेच इमारतीत प्रवेश करण्यासाठी लाकडी फळीवरून कसरत करून जावे लागत आहे, असा आरोप सामाजिक कार्यकर्ते राजू नलावडे यांनी आहे.