सिमेंट काँक्रीटीकरणाच्या रस्‍त्‍यावर पुन्‍हा खोदाई
वाहनचालक, नागरिकांची मोठी गैरसोय
सकाळ वृत्तसेवा
डोंबिवली, ता. १२ ः कल्याण-डोंबिवली शहरातील रस्त्यांचे सिमेंट काँक्रीटीकरण करण्यात आले असले तरी अनेक ठिकाणी गटारांची कामे, महानगर गॅस पाइपलाइन, अमृत योजनेची काम सुरू आहेत. यामुळे अनेक ठिकाणी रस्ते खोदण्यात आली आहेत, मात्र दुरुस्‍तीच्‍या कामानंतर सदरील रस्‍ते व खड्डे बुजवून तसेच सोडून देण्यात आले आहे. त्‍यामुळे पावसाळा काही दिवसांवर आला असताना अर्धवट सोडून दिलेल्या कामामुळे स्‍थानिकांची गैरसोय होणार आहे. यामुळे नाराजी व्‍यक्‍त करण्यात येत आहे.
कल्याण-डोंबिवलीत रस्‍त्‍याचे सिमेंट काँक्रीटीकरण केल्यावर विविध कामानिमित्त पुन्‍हा खोदण्यात येत आहे. डांबरीकरण केलेल्या रस्त्यांवर पावसाळ्यात खड्डे पडून रस्ते खराब होत आहेत. यामुळे वाहनचालक, नागरिकांची मोठी गैरसोय होत आहे. नागरिकांना चांगल्या रस्त्यांची सुविधा मिळावी, यासाठी पालिका हद्दीतील अनेक रस्ते हे सिमेंट काँक्रीटीकरण करण्याचा निर्णय प्रशासनाच्या वतीने घेण्यात आला. एमएमआरडीए, एमएसआरडीसी, कल्याण-डोंबिवली महापालिका यांच्या माध्यमातून शहरातील रस्त्यांचे सिमेंट काँक्रीटीकरण करण्यात येत आहे. साधारणतः ४० ते ५० टक्के रस्त्यांचे सिमेंट काँक्रीटीकरण करण्यात आले असून, गटार बांधणीचे काम सुरू आहे. अनेक ठिकाणी ही कामे अर्धवट अवस्थेत असल्याने बाजूने रस्ते उखडले गेले आहेत, तर काही ठिकाणी केबल वायर, जल मलनिस्सारण वाहिन्या, महानगर गॅसवाहिनी टाकण्यासाठी रस्‍ते खोदण्यात आले आहे. ही कामे झाल्यानंतर तो भाग माती व खडीचा भराव टाकून तसाच सोडून दिला जातो. यामुळे सध्या शहरातील अनेक रस्त्यांची दुरवस्था झाली आहे. वाहनचालकांना आताच अनेक गैरसोयींचा सामना करावा लागत आहे. पावसाळ्यात तर या रस्त्यांची अवस्था आणखी बिकट होण्याची शक्यता वर्तविली जात आहे.