तानसा अभयारण्यात दोन दिवसीय वन्यजीवांची गणना
मचाण, निरीक्षण मनोऱ्याची उभारणी; अत्‍याधुनिक तंत्रज्ञानाचा वापर
शहापूर, ता. १२ (वार्ताहर) : शहापूर तालुक्यातील तानसा अभयारण्यात दोन दिवसीय बौद्धपौणिमेच्यानिमित्ताने वन्यजीवांची गणना होत आहे. सोमवारी (ता. १२) बौद्धपौर्णिमेच्या शुभ्र चंद्रप्रकाशात वन्यजीवांची गणना करण्यात येणार आहे. त्यासाठी येथील वनविभागाच्या वन्यजीव विभागाने जोरदार तयारी केली आहे. एकीकडे मानवी हस्तक्षेपामुळे वन्य प्राण्यांच्या संख्येवर परिणाम झाला आहे. त्‍यामुळे दरवर्षी बौद्धपौर्णिमेच्या दिवशी तानसामध्ये वन्यजीवांची गणना करण्यात येते.
कोरोना कालावधीत २०२१ ला या गणनेला अपवादात्मक स्थगिती देण्यात आली होती. ही स्थगिती वगळता दरवर्षीच्या बौद्धपौर्णिमेला वन्यजीवांची गणना थांबविल्याची नोंद नाही. बौद्धपौर्णिमेला रात्री सर्वाधिक प्रकाश असल्याने वन्यप्राण्यांची गणना करणे सोपे जाते. पूर्वी विष्ठा तसेच ठशांचा अभ्यास करून प्राणी गणना केली जात होती. गेल्या काही वर्षांपासून पारंपरिक पद्धतीसोबतच कॅमेरा टॅपिंग आणि ट्रान्झॉक्ट मेथडचा वापर केला जात आहे. मिळालेल्या माहितीची सरासरी काढून आकडे जाहीर करण्यात येणार आहेत. गणनेसाठी मचाण, निरीक्षण मनोरे उभारले असून ट्रॅप कॅमेरे लावण्यात आले आहेत. वन्यजीव विभागाचे कर्मचारी आणि प्राणिप्रेमी रात्रभर पाणवठ्यावर बसून प्राण्यांच्या हालचालींचे निरीक्षण करतात. पाणी पिण्यासाठी येणाऱ्या प्राण्यांची माहिती घेऊन त्‍याची नोंद करतात. या प्रगणनेत वन्यजीव विभागाचे वनपरिक्षेत्र अधिकारी रमेश रसाळ, एकनाथ रोंगटे, प्रकाश चौधरी आदी सहभागी होणार आहेत.
...........
कोट
तानसात विविध प्रजातीचे पक्षी आणि प्राणी आहेत. दरवर्षी बौद्धपौर्णिमेला त्यांची गणना करण्यात येते. यावर्षी देखील या गणनेसाठी तयारी करण्यात आली आहे. तानसामध्ये मुंबईला पाणीपुरवठा करणारी तानसा, मोडकसागर, मध्यवैतरणा ही जलाशये असल्याने वन्यजीवांसाठी उत्तम पाणवठे आहेत. या पाणवठ्यांमुळे प्राण्यांची नोंद घेणे सोपे जात आहे.
-रमेश रसाळ, वनपरिक्षेत्र अधिकारी, तानसा