मुरबाड-कल्याण रस्त्यावर वाहतूक कोंडी
मुरबाड, ता. १२ (बातमीदार) ः मुरबाड-कल्याण रस्‍त्‍यावरील गोविली येथे सायंकाळच्या वेळेस वाहतूक कोंडीमुळे वाहनचालक त्रस्‍त झाले आहेत. त्‍यामुळे या वाहतूक कोंडीवर लवकरात लवकर तोडगा काढण्यात यावा, अशी मागणी करण्यात येत आहे.
मुरबाड-कल्याण मार्गावरील रेवती व रायते गावापर्यंत वाहनांच्या रांगा लागत आहेत. रविवार तसेच सुट्टीच्‍या दिवशी या मार्गावर दोन ते तीन किलोमीटर वाहनांच्या रांगा दिसून येतात. मुरबाड शहरातून तसेच तालुक्यातून दररोज हजारो प्रवासी कल्याण-मुंबईकडे प्रवास करत असतात, तर कल्याण येथूनसुद्धा मुरबाड एमआयडीसी व इतर ठिकाणी कामावर जाणाऱ्या प्रवाशांची संख्या मोठी आहे. मुरबाड-कल्याण रस्त्याचे चौपदरीकरण व सिमेंट काँक्रीटीकरण करण्याचे काम सुरू आहे. गोवेली गावाजवळ टिटवाळा येथून येणारी वाहने मुरबाड-कल्याण या रस्त्यावर एकत्र येतात. त्यामुळे दररोज येथे वाहतूक कोंडी होत आहे. त्‍यामुळे या ठिकाणी दोन्ही दिशेला वाहतूक पोलिस बंदोबस्तासाठी तैनात करण्यात यावेत, अशी मागणी वाहनचालकांसह प्रवाशांकडून करण्यात येत आहे. गोवेली बस स्टॉपजवळ नवीन रस्ता तयार करण्याच्या कामासाठी जुना रस्ता खोदण्यात आला आहे. येथून एकेरी मार्गाने वाहतूक सुरू आहे. टिटवाळा बाजूकडून येणाऱ्या वाहनांना या रस्त्यावर लवकर प्रवेश मिळत नाही. त्यामुळे मुरबाड व कल्याणकडे जाणाऱ्या वाहनांची मोठी रांग लागते.