वीजबिल वेळेत भरण्याचे आवाहन
मुलुंड, ता. १२ (बातमीदार) ः महावितरण मुलुंड विभागाच्या माहितीनुसार एप्रिल २०२५ या महिन्यासाठी ग्राहकांकडे ५६.८७ कोटींच्या वीजबिलांची मागणी करण्यात आली होती, मात्र त्यापैकी ५२.५१ कोटीच वसूल झाले असून, ४.३६ कोटी रुपयांची थकबाकी आहे. महावितरणने सर्व घरगुती, व्यावसायिक व औद्योगिक ग्राहकांना वीजबिल वेळेत भरण्याचे आवाहन केले आहे. बिले थकीत राहिल्यास वीजजोडणी खंडित करण्याची कार्यवाही करण्यात येईल, असा इशारा देण्यात आला आहे. ही थकबाकी सध्याच्या आणि मागील बिलांची एकत्रित रक्कम असून, वेळेवर भरणा न झाल्याने ती वाढत आहे. वीजचोरी रोखण्यासाठी कार्यकारी अभियंता राजेश थूल यांच्या मार्गदर्शनाखाली विशेष मोहीम राबवली जात आहे. वीजचोरी करणाऱ्यांवर कडक कारवाई होणार असल्याचे अतिरिक्त कार्यकारी अभियंता दीपक जाधव यांनी सांगितले.