उरण, ता. १२ (वार्ताहर) : सर्व दानापेक्षा देहदान हे सर्वश्रेष्ठ समजले जाते. हाच उद्देश डोळ्यासमोर ठेवून चिरनेर गावातील नरेश नारंगीकर या युवकाने आपल्या वाढदिवसाचे औचित्य साधून रविवारी (ता. ११) अवयव दानाचा संकल्प केला आहे. त्यांच्या या कार्याबद्दल चिरनेरवासीयांनी अभिनंदन करत शुभेच्छा दिल्या. देहदान ही बदलत्या काळाची गरज आहे. अनेकांना हृदय, यकृत, मूत्रपिंड आणि फुप्फुसासारख्या समस्यांनी ग्रासले आहे. अशा लोकांना जीवन देण्याचे काम हे देहदानातून करता येते. यातून प्रेरित झालेल्या नरेश नारंगीकर यांनी आपल्या वाढदिवसाचे औचित्य साधून देहदान करण्याचा निर्णय घेतला. नरेश नारंगीकर यांच्या या कार्याबद्दल चिरनेरचे सरपंच भास्कर मोकल, माजी उपसरपंच बबन गोंधळी, संतोष म्हात्रे, संजय गायकर, मनोज पाटील, प्रसाद फोफेरकर, मंगेश ठाकूर, गणेश चिरनेरकर, जितेंद्र नारंगीकर, सदानंद पाटील, मनोहर नाईकांसह गावकऱ्यांनी कौतुक केले.