नवी मुंबई, ता. १२ (वार्ताहर) : आपत्कालीन परिस्थितीत यंत्रणांची तयारी आणि प्रतिसाद क्षमतेची चाचणी घेण्यासाठी ‘ऑपरेशन अभ्यास’ या मॉक ड्रिलचे आयोजन वाशी सेक्टर १२ येथील नीलसिद्धी टॉवर परिसरात मंगळवारी (ता. १३) दुपारी ४ वाजता करण्यात आले आहे. विविध आपत्ती यंत्रणा यात सहभागी होणार आहेत.
जिल्हाधिकारी तथा नागरी संरक्षण दलाचे नियंत्रक अशोक शिनगारे, नवी मुंबई महापालिका आयुक्त डॉ. कैलास शिंदे, अप्पर जिल्हाधिकारी हरिश्चंद्र पाटील, निवासी उपजिल्हाधिकारी डॉ. संदीप माने, अतिरिक्त आयुक्त सुनील पवार, प्रांताधिकारी उर्मिला पाटील व शहर अभियंता तथा मुख्य अग्निशमन अधिकारी शिरीष आरदवाड, नागरी संरक्षण दलाचे उपनियंत्रक विजय जाधव यांच्या मार्गदर्शनाखाली तहसीलदार उमेश पाटील यांच्या पुढाकारातून हे मॉक ड्रिल पार पडणार आहे. सर्व यंत्रणांनी या मॉक ड्रिलला गांभीर्याने घ्यावे. केंद्रीय गृह विभागाने दिलेल्या सर्व मार्गदर्शक सूचनांचे पालन करून यशस्वीरित्या ही मॉक ड्रिल पार पाडावी, मॉक ड्रिलच्या दरम्यान सूचना मिळाल्यानंतर दुपारी ४ वाजता सायरन वाजवून नागरिकांना धोक्याचा इशारा दिला जाईल. यादरम्यान नागरिकांनी घाबरू नये, अफवांवर विश्वास ठेवू नये, सेल्फी काढू नये आणि प्रशासनाकडून दिलेल्या सूचनांचे पालन करावे, हे मॉक ड्रिल केवळ पूर्वतयारीचा भाग असून, कोणतीही खरी आपत्ती उद्‍भवलेली नाही, हे लक्षात घ्यावे, असे आवाहन तहसीलदार उमेश पाटील यांनी केले आहे.
------------------
मॉक ड्रिलमध्ये होणारा घटनाक्रम
- प्रथम दुपारी ४ वाजता सायरन वाजणार.
- बॉम्ब हल्ल्याची सूचना मिळणार.
- सर्व नागरिकांना सुरक्षित ठिकाणी पोहोचण्यासाठीच्या सूचना दिल्या जाणार.
- धावाधाव, गडबड न करता नागरिकांना सुरक्षित ठिकाणी पोहोचविले जाईल.
- संबंधित परिसरात शोधमोहीम घेऊन जखमी, अडकलेल्या नागरिकांची तत्काळ सुटका करणे, त्यांना प्रथमोपचार करणे, ही कार्यवाही करण्यात येईल.