जुन्या भांडणाच्या वादातून तिघांना बेदम मारहाण; आठ जणांवर गुन्हा दाखल
भिवंडी, ता. १२ (वार्ताहर) : शेजाऱ्याने शिवीगाळ केल्याचा जाब विचारल्याने जुन्या भांडणाचा राग मनात धरून आठ जणांनी संगनमताने जाब विचारणाऱ्या शेजाऱ्यासह त्याच्या मावशी व मुलीला बेदम मारहाण केल्याची घटना घडली. ही घटना शांतीनगर परिसरातील नदिया पार येथील परिसरात रविवारी (ता. ११) सायंकाळी घडली. याप्रकरणी आठ जणांच्या विरोधात शांतीनगर पोलिस ठाण्यात गुन्हा दाखल करण्यात आला आहे.

फजल अता मोहमद अन्सारी (वय २०), मेराज, तारीक, मेहंदी, फजलची आई जमिला अता मोहमद अन्सारी, तंजीला अता मोहमद अन्सारी, आफरीन व एक अनोळखी व्यक्ती अशी गुन्हा दाखल झालेल्यांची नावे आहेत. तर मोहमद कसीम वसीम अहमद अन्सारी (२६), कसीमची मावशी नाजीया जहाँ व तिची मुलगी नाजनीन अशी जखमींची नावे आहेत. पोलिसांनी दिलेल्या माहितीनुसार आरोपी आणि जखमी हे एकमेकांचे शेजारी आहेत. त्यांच्यामध्ये यापूर्वी भांडणही झाले होते. दरम्यान, याच भांडणाच्या रागातून आरोपींनी फिर्यादींना मिराज मस्जिदच्या समोरील रस्त्यावर रविवारी सायंकाळी शिवीगाळ केली. त्यामुळे याचा जाब कसीमने आरोपींना विचारताच शेजारील आठ जणांनी आपसात संगनमताने दमदाटी करीत शिवीगाळ करून ठोश्या-बुक्क्यांसह मारहाण केली. हे भांडण सोडवण्यासाठी गेलेल्या नाजीया जहाँ व नाजनीन या दोघांनाही आरोपींनी मारहाण केली आहे. याप्रकरणी आठ जणांच्या विरोधात शांतीनगर पोलिस ठाण्यात गुन्हा दाखल करण्यात आला आहे.