हृदयातील ट्युमर काढण्यात जेजेतील डॉक्‍टरांना यश
मुंबई, ता. १३ : सरकारी जेजे रुग्णालयातील कार्डिओव्हस्कुलर थोरॅसिक सर्जरी (सीव्हीटीएस) विभागातील डॉक्टरांनी ओपन हार्ट सर्जरी करून एका ४५ वर्षीय रुग्णाच्‍या हृदयातील ट्युमर काढण्यात यश मिळवले आहे. रुग्णाला प्रथम स्ट्रोकच्या उपचारासाठी रुग्णालयात दाखल करण्यात आले होते. उपचारादरम्यान, त्याच्या हृदयात ट्युमर असल्याचे आढळून आले. या ट्युमरमुळे त्याला पुन्हा ब्रेन स्ट्रोक येण्याची शक्‍यता होती.
मालाड येथील रहिवासी वनेश पटेल यांना ब्रेन स्ट्रोकच्या उपचारासाठी जेजे रुग्णालयाच्या औषध विभागात दाखल करण्यात आले होते. त्यांना रक्तदाबाचा त्रास होत होता. त्‍यामुळे याचे कारण शोधण्यासाठी रुग्णाच्या ऊतींची तपासणी करण्यात आली. टू डी इकोमध्ये हृदयाच्या डाव्या चेंबरमध्ये गाठ दिसली. यानंतर एमआरआय चाचणीतही गाठीची पुष्टी झाली. यामुळे वनेश याने उपचारासाठी दुसऱ्या रुग्णालयात जाण्याची शक्‍यता वर्तविली; मात्र डॉक्टरांनी हा एक गंभीर धोका असल्याचे सांगितले. शिवाय, त्याला पुन्हा जेजे रुग्णालयात जाण्याचा सल्ला दिला. जेजे रुग्णालयाच्या सीव्हीटीएस विभागाचे असोसिएट प्रोफेसर आणि युनिटप्रमुख डॉ. सूरज वासुदेव नागरे यांनी वनेशला शस्त्रक्रिया करण्याचा सल्ला दिला. यानंतर डॉ. सूरज नागरे यांनी रुग्णालयाचे अधीष्ठाता डॉ. अजय भंडारवार, अधीक्षक डॉ. संजय सुरासे आणि विभागप्रमुख डॉ. आशीष राजन भिवापूरकर यांच्या सहकार्याने ती गाठ काढून टाकली.
.................
एक ते दोन टक्के रुग्णांमध्ये गाठ आढळते
डॉ. सूरज यांच्या मते, फक्त एक किंवा दोन टक्के रुग्णांच्या हृदयात गाठ आढळते. जर ही गाठ काढली नसती तर त्याचे भाग तुटून मेंदू किंवा फुप्फुसात जाऊ शकले असते. रुग्ण वनेश म्हणाले, की जेजे रुग्णालयाच्या डॉक्टरांनी माझ्यावर यशस्वी उपचार करून मला नवीन जीवन दिले आहे.