खारघर, ता. १३ (बातमीदार) : दिवा-पनवेल रेल्वे मार्गावरील पिसार्वे रेल्वे फाटकदरम्यान रेल्वे आणि सार्वजनिक बांधकाम विभागाने उभारलेले उड्डाणपूल वाहतुकीसाठी खुले करण्यात आले आहेत. त्यामुळे पिसार्वेसह परिसरातील आठ ते दहा ग्रामस्थांची रेल्वे फाटकमधून सुटका झाल्यामुळे ग्रामस्थ समाधान व्यक्त करीत आहेत.
दिवा-पनवेल रेल्वे मार्गावर कोकण रेल्वे, तसेच पनवेल, पुणे आणि कल्याण रेल्वेमार्गे मोठ्या प्रमाणात रेल्वे धावतात. त्यामुळे पिसार्वे गावासमोर रेल्वे फाटक उभारण्यात आले होते. पिसार्वे गावासह परिसरातील बाळे, वाकलन, तुर्भे, धानसर, पिसावे, बाम्मली, नऱ्हेन आदी गावांतील विद्यार्थ्यांना शिक्षणासाठी, तसेच परिसरातील ग्रामस्थांना सरकारी आणि इतर कामांसाठी पनवेलला जावे लागते; मात्र दिवा-पनवेल रेल्वे मार्गावर दर पाच ते दहा मिनिटांनी धावणाऱ्या प्रवासी आणि मालवाहू रेल्वेमुळे पिसार्वे रेल्वे फाटकवर नागरिक व विद्यार्थ्यांना ताटकळत उभा राहावे लागत असे. पिसार्वे तसेच रोहिंजन परिसरातील वाढत्या विकासामुळे रेल्वे फाटकवर वाहतूक कोंडी होत होती. ही समस्या लक्षात घेऊन रेल्वे आणि सार्वजनिक बांधकाम विभागाने पिसार्व रेल्वे फाटक येथे उड्डाणपुलाचे काम हाती घेतले होते. हे काम पूर्ण झाल्यामुळे पूल वाहतुकीसाठी खुला केल्यामुळे रेल्वे फाटकमधून नागरिकांची सुटका झाल्यामुळे पिसार्वेसह परिसरातील गावांतील शेतकरी समाधान व्यक्त करीत आहेत.
--------------------
बांधकाम व्यावसायिकांनाही मोठा लाभ
कल्याण, डोंबिवली या शहरांना थेट नवी मुंबईशी जोडणाऱ्या कल्याण-तळोजा मेट्रोचे काम वेगाने सुरू आहे. मेट्रो मार्गावर तळोजा वसाहतीलगत असलेल्या बाळे, वाकलन, तुर्भे, पिसार्वे, धानसर, पिसावे, बाम्मली आणि नऱ्हेन आदी गावांचा समावेश आहे. तळोजा-कल्याण मेट्रो प्रकल्पामुळे काही विकसकांनी परिसरातील शेतकऱ्यांची जमीन खरेदी करून गृहप्रकल्प उभारणीला सुरुवात केली आहे. दरम्यान, पिसार्वे रेल्वे फाटक बंद केल्यामुळे येथील गृहप्रकल्पाला अधिक मागणी येणार असल्यामुळे बांधकाम व्यावसायिक समाधान व्यक्त करीत आहेत.