वाशी, ता. १३ (बातमीदार) : महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी २०२५ मध्ये घेण्यात आलेल्या माध्यमिक शालांत (इयत्ता १० वी) परीक्षेचा निकाल यंदा महिनाभर आधी लागला आहे. मंगळवारी यंदाचा ऑनलाइन निकाल जाहीर करण्यात आला. यात ठाणे जिल्ह्याचा निकाल ९३.८० टक्के लागला आहे; तर नवी मुंबईचा ९७.३२ टक्के निकाल लागला आहे. निकालात यंदाही मुलीच सरस ठरल्या आहेत.
नवी मुंबई महापालिका क्षेत्रातून एकूण १५७ शाळांमधून १५ हजार ५०० विद्यार्थ्यांनी परीक्षेसाठी अर्ज केला होता. त्यापैकी १५ हजार ४६४ विद्यार्थी परीक्षेला बसले होते. त्यातून १५ हजार ५० उत्तीर्ण झाले आहेत. यंदा परीक्षेला बसलेल्या मुलांची संख्या जरी अधिक असली तरी उत्तीर्ण होणाऱ्या मुलींची टक्केवारी अधिक असल्याने यंदादेखील मुलींनीच बाजी मारली आहे. नवी मुंबईत ९८.०९ टक्के मुली उत्तीर्ण झाल्या असून, ९६.६१ टक्के मुले उत्तीर्ण झाली आहेत.
--------------------
अनुत्तीर्ण विद्यार्थ्यांची पुढील महिन्यात परीक्षा
नवी मुंबई महापालिका क्षेत्रात दुपारी १ वाजता ऑनलाइन निकाल जाहीर करण्यात आल्यानंतर मोबाईल आणि सायबर कॅफेमध्ये आपला निकाल पाहण्यासाठी विद्यार्थ्यांनी गर्दी केली होती. अनुत्तीर्ण झालेल्या मुलांना पुढील महिन्यात परीक्षा देता येणार आहे. त्यामुळे विद्यार्थ्यांनी खचून न जाता पुन्हा परीक्षेला सामोरे जावे, असे आवाहन राज्य माध्यमिक व उच्च माध्यमिक शिक्षण मंडळाचे मुंबई विभागीय अध्यक्ष राजेंद्र अहिरे यांनी केले आहे.