रोहा, ता. १५ (बातमीदार) ः तालुक्यातील उसर मार्गावर बेलवाडी येथे गावठी दारू तयार करण्यात येत असल्‍याची माहिती राज्य उत्पादन शुल्क विभागाला मिळाली होती. त्‍यानुसार भरारी पथकाने जंगल परिसरात कारवाई करून दारूच्या दोन हातभट्ट्या उद्‌ध्वस्त केल्‍या असून, टेम्पोसहित दोन हजार किलो काळा गूळ जप्त केला. कारवाईनंतर गावठी दारूविक्रीची निर्मिती करणाऱ्यांचे धाबे दणाणले आहेत.
रोहा तालुक्यात जंगलपट्ट्यातील बेलवाडी गावात अनेक वर्षांपासून गावठी दारूचे अड्डे राजरोस सुरू आहेत. या गावठी भट्ट्यांची माहिती राज्य उत्पादन शुल्क विभागाला समजल्यानंतर भरारी पथकाने वरिष्ठ जिल्हा पोलिस अधीक्षक रवीकिरण कोल्हे यांच्या मार्गदर्शनाखाली छापा टाकला. या वेळी दोन गावठी दारूच्या भट्ट्या उद्‌ध्वस्त केल्या तसेच या ठिकाणी दारू बनवण्यासाठी असलेले सर्व साहित्‍य नष्ट केले.

एकावर गुन्हा दाखल
राज्‍य उत्‍पादन शुल्‍कच्या भरारी पथकाने केलेल्‍या कारवाईत टेम्पोसह दोन हजार किलो काळा गूळ सापडला. पोलिसांनी वाहन जप्त करून दिनेश कोंडू शिंदे (रा. बेलवाडी) याच्या घरात साठवून ठेवलेला काळा गूळ जप्त केला आहे. गाडीत १२५ आणि घरात साठवून ठेवलेल्या ७५ गुळाच्या ढेपा असा दोन हजार किलो गूळ जप्त केला. जंगल भागातील दोन हातभट्ट्या पोलिसांनी उद्‌ध्वस्त केल्या असून, २,८०० लिटर रसायनमिश्रित दारू नष्ट केली. याप्रकरणी दिनेश कोंडू शिंदेविरोधात गुन्हा दाखल करण्यात आला आहे.

रोहा : उत्पादन शुल्क विभागाच्या पथकाने गावठी दारूचे अड्डे उद्‌ध्वस्त केले.