इराणी आणि शिकलगार टोळीचे सदस्य जेरबंद
मोक्काअंर्तगत कारवाई प्रस्तावित
सकाळ वृत्तसेवा
ठाणे, ता. १६ : सोनसाखळी चोरी, दरोडा, घरफोडी यासारखे गुन्हे करणारे सराईत इराणी आणि शिकलगार या टोळीतील चार सक्रिय सदस्यांना ठाणे शहर पोलिसांनी अटक केली. त्यांच्याकडून २९ गुन्हे उघडकीस आणून त्यामधील ३६ लाख २९ हजार रुपये किमतीचा मुद्देमाल हस्तगत केला आहे. इराणी टोळीतील दोघे भाऊ-बहीण आणि शिकलगार टोळीमधील दोघे माय-लेक आहेत. तसेच त्यांच्यावर मोक्काअंर्तगत करवाई करण्यात येईल, अशी माहिती शुक्रवारी (ता. १६) ठाणे गुन्हे शाखेचे उपायुक्त अमरसिंह जाधव यांनी दिली.
कल्याण गुन्हे शाखा घटक ३च्या पोलिसांनी इराणी टोळीतील वसीम युसूफ अली सय्यद उर्फ वसीम काला (वय ३०) आणि त्याची बहीण कौसर युसूफ अली जाफरी उर्फ बुशी (वय ३३) तसेच शिकलगार टोळीतील शिवासिंग अमिरसिंग बावरी (वय २५) आणि त्याची आई पूनमकौर अमिरसिंग बावरी (वय ३७ ) या मायलेकांवर पाळत ठेवत त्यांना अटक केली. चौकशीत दोन्ही टोळ्यांनी ठाणे, नवीमुंबई या पोलिस आयुक्तालयातील २९ गुन्ह्यांची कबुली दिली. त्यामध्ये दरोड्याचा एक, सोनसाखळीचे २०, मोटार वाहन चोरी पाच आणि घरफोडीचे तीन या २९ गुन्ह्यांतील ३६ लाख २९ हजार ७२५ रुपयांचे सोन्याचे दागिने आणि सहा चारचाकी गाड्या जप्त केल्या आहेत, तर तपासात आणखी गुन्हे उघडकीस येण्याची शक्यता वर्तवण्यात आली आहे.
दरम्‍यान, इराणी टोळीमधील आंबिवली येथे राहणारे वसीम आणि कौसर या भाऊ-बहिणीवर जबरी चोरीचे ३० पेक्षा जास्त गुन्हे दाखल आहेत, तर कल्याण येथे राहणाऱ्या शिकलगार टोळीतील शिवासींग आणि त्याची आई पूनमकौर यांच्यावर ठाणे, नवी मुंबईत २५ पेक्षा जास्त गुन्हे दाखल आहेत, अशी माहिती पोलिसांनी दिली.