नेरूळ, ता. १८ (बातमीदार) : नवी मुंबई महापालिकेच्या माध्यमिक शाळांना २०२३ साली शिक्षकांची कमतरता भासल्यानंतर पालिकेच्या तत्कालीन आयुक्तांनी शिक्षकांची जाहिरात देऊन शैक्षणिक वर्ष २०२३-२४ साठी शिक्षकांची नवीन भरती केली. या शिक्षकांना महापालिकेने शैक्षणिक वर्ष २०२४-२५ साठी पुनर्नियुक्तीचे आदेश दिले होते. त्यानुसार महापालिकेने मानवतावादी दृष्टिकोन ठेवून घड्याळी तासिका तत्त्वावरील शिक्षकांना पुनर्नियुक्तीचे आदेश देण्याची मागणी कामगार नेते रवींद्र सावंत यांनी महापालिका प्रशासनाकडे केली आहे.
तासिका तत्त्वावरील शिक्षकांनी सलग दोन वर्षे महापालिका शाळेमध्ये सेवा केलेली आहे. या कालावधीत वाढत्या महागाईच्या काळात कमी वेतनामध्ये त्यांनी प्रामाणिकपणे काम केले आहे. सरकारी सुट्टी, साप्ताहिक सुट्टी, गणेशोत्सव, दिवाळी व उन्हाळी सुट्टीमध्ये या शिक्षकांनी विनावेतन काम केले आहे. या शिक्षकांना महापालिकेने दिवाळीचे सानुग्रह अनुदानही दिलेले नाही. त्यामुळे या गुणवत्ताधारक शिक्षकांना येणाऱ्या शैक्षणिक वर्षासाठी पुनर्नियुक्ती देण्यासाठी महापालिकेने स्वत:हून पुढाकार घेणे गरजेचे आहे. महापालिका प्रशासनाला शिक्षकांची गरज आहे. या शिक्षकांना महापालिकेत शाळेत शिकविण्याचा अनुभव आहे. त्यामुळे महापालिकेने मानवतावादी दृष्टिकोन ठेवून घड्याळी तासिका तत्त्वावरील माध्यमिक शिक्षकांना पुनर्नियुक्तीचे आदेश देण्याची मागणी कामगार नेते रवींद्र सावंत यांनी महापालिका प्रशासनाकडे केली आहे.